دنیا بھر میں ہندو مذہب کا تہوار دیوالی منایا جارہا ہے۔ یہ روشنیوں کا تہوار ہے اور اس موقع پر ہندو برادری انتہائی عقیدت و احترام سے تقریبات کا اہتمام کرتی ہے۔
دیوالی کی تاریخ بے حد قدیم ہے اور ہندو مت کے قدیم پرانوں میں اس کا ذکر’روشنی کی اندھیرے پرفتح کے دن‘ کے طور پر کیا جاتا ہے۔
دیوالی 5 روزہ تہوار ہے جس میں اصل دن ہندو کلینڈر کے مطابق ’کارتیک‘ نامی مہینے کا پہلا دن ہے۔
دیوالی کی تقریبات کا آغاز دو روز پہلے کردیا جاتا ہے۔
جس کے بعد یہ نئے چاند کے طلوع ہونے کے دو دن بعد تک جاری رہتی ہیں۔
ہندو برادری اس موقع پر خصوصی اہتمام کرتی ہے۔ نئے لباس زیب تن کیے جاتے ہیں اور گھروں اور بازاروں کی صفائی ستھرائی کی جاتی ہے۔
دیا اور رنگولی دیوالی کے تہوار کے اہم جزو ہیں اور بچے اس موقع پر آتش بازی کرتے ہیں۔
اس موقع پر مندروں میں لکشمی پوجا کا اہتمام کیا جاتا ہے اور پرساد تقسیم ہوتا ہے۔
