تیونس: برطانوی ڈی جے ایکس کو میوزک آلات پر اذان بجانے کا الزام ثابت ہونے پر ایک سال قید کی سزا سنا دی۔
برطانوی جریدے کے مطابق تیونس کی عدالت نے میوزک آلات پر اذان بجانے والے ڈی جے کو ایک سال قید کی سزا سنانے کا فیصلہ جاری کردیا ہے، برطانوی ڈی جے نے تیونس کے نائٹ کلب میں میوزک آلات پر اذان بجانے کا مظاہرہ کیا تھا۔
تیونس کورٹ کے ترجمان یلیس میلادی کا کہنا ہے کہ ڈے جے ایکس کے خلاف عوامی شکایات موصول ہوئیں تھیں جس کی بنیاد پر مقدمہ درج کیا گیا تاہم برطانوی نژاد فنکار ملک چھوڑ گیا‘‘۔ تیونس کے گورنر نے کہا کہ عدالتی فیصلہ انصاف پر مبنی ہے کیونکہ ہم کسی مذہب کی توہین کو جرم سمجھتے ہیں۔
یاد رہے تیونس کے معروف کلب نے دو ڈی جیز کے درمیان مقابلے کا انعقاد کروایا تھا جس میں عوام کی بڑی تعداد نے شرکت کی تھی، مقابلہ جیتنے کی کوشش میں برطانوی ڈی جے نے میوزک کی دھن پر اذان بجا ڈالی۔
ڈی جے ایکس تیونس سے یورپ منتقل ہوگئے ہیں، عدالتی فیصلے پر انہوں نے کہا کہ ’’میں نے جو دھن بجائی وہ ریلیز نہیں کی کیونکہ مسلمانوں کے جذبات کی قدر ہے۔انہوں نے کہا کہ ’’میں اپنی غلطی پر نادم ہوں اس لیے معافی کا طلب گار ہوں‘‘۔
