اسلام آباد: وفاقی دارالحکومت اسلام آباد میں پولی کلینک اسپتال کے ڈاکٹر میں کرونا وائرس کی تصدیق ہوگئی۔
اے آر وائی نیوز کی رپورٹ کے مطابق اسلام آباد میں کرونا وائرس کا ایک اور کیس سامنے آگیا، پولی کلینک اسپتال کے ڈاکٹر میں کرونا وائرس کی تشخیص ہوئی ہے۔
اسپتال ذرائع کا کہنا ہے کہ کرونا وائرس سے متاثر ڈاکٹر کا تعلق گلگت بلتستان سے ہے، متاثرہ ڈاکٹر نے بیرون ملک سفر نہیں کیا، ڈاکٹر میں کرونا کی تصدیق کے بعد ڈاکٹرز ہاسٹل کو سیل کرنے کا فیصلہ کیا گیا ہے۔
ذرائع کا کہنا ہے کہ انتظامیہ نے ہاسٹل میں رہائش پذیر ڈاکٹر زکو قرنطینہ شفٹ کرنے کا فیصلہ کیا ہے، ڈاکٹرز کو او جی ڈی سی ایل کے قرنطینہ میں شفٹ کیا جائے گا۔
مزید پڑھیں: کراچی پولیس کا افسر بھی کروناوائرس کا شکار ہوگیا
واضح رہے کہ کراچی میں پولیس افسر بھی کرونا وائرس میں مبتلا ہوگیا، ضلع ساؤتھ انویسٹی گیشن میں تعینات انسپکٹر کو اسپتال منتقل کردیا گیا۔
پولیس ترجمان کا کہنا تھا کہ انسپکٹر کا کرونا ٹیسٹ مثبت آیا ہے اہلخانہ کے ٹیسٹ کیے جارہے ہیں۔ آئی جی سندھ نے شعبہ ویلفیئر کو متاثرہ افسر کے علاج کے لیے اقدامات کی ہدایت کردی۔
خیال رہے ملک بھر میں کرونا کے کیسز کی تعداد 1296 ہوگئی ہے، سندھ میں 440، پنجاب میں 448، بلوچستان میں 131، خیبرپختونخوا میں147، گلگت بلتستان میں 91، آزادکشمیر میں دو ہوگئی جبکہ متاثرہ 23 مریض صحت یاب ہوئے۔
لاہور میں کرونا وائرس میں مبتلا ایک اور شخص جان کی بازی ہار گیا ہے، جس کے بعد ملک میں وائرس سے جاں بحق ہونے والوں کی تعداد 10 ہوگئی جبکہ صوبائی اور وفاقی حکومتیں وائرس پر قابو پانے کے لیے ہرممکن اقدامات کررہی ہیں۔
