لاہور : اقبال ٹاؤن مون مارکیٹ میں رئیس زادے کے کتوں نے غریب معصوم بچے کو بھنبھوڑ ڈالا، دونوں کتے عمران نامی شہری کے ہیں جسے پولیس نے گرفتار کر کے مقدمہ درج کرلیا۔
تفصیلات کے مطابق لاہور کے علاقے اقبال ٹاؤن کے پارک میں پلاسٹک فٹبال بیچنے والے محنت کش بچے پر وہاں موجود دو پالتو کتوں نے حملہ کر دیا جس سے بچہ شدید زخمی ہو گیا، مذکورہ کتے علاقے کے ایک رئیس زادے عمران کے ہیں۔
پارک میں موجود شہریوں نے فوری طور پر بچے کو اسپتال منتقل کیا، شہریوں نے کتوں کے مالک کو پکڑنے کی کوشش کی تاہم وہ وہاں سے فرار ہونے میں کامیاب ہوگیا تاہم بعد ازاں پولیس نے ملزم عمران کو گرفتار کرکے مقدمہ درج کرلیا۔
اس حوالے سے علاقہ مکینوں کا کہنا ہے پارکس بند ہونے کے باوجود کتوں کا مالک انہیں پٹے یا زنجیر کے بغیر لاتا ہے اور کھلا چھوڑ دیتا ہے۔
لاہور سے اے آر وائی نیوز کے نمائندے بابر خان نے بتایا کہ زخمی بچے کے والد نے پولیس کے دباؤ میں آکر ملزم عمران کو معاف کردیا، پولیس افسران نے واقعے کا مقدمہ اپنی مدعیت میں درج کیا ہے۔
رپورٹر کے مطابق مقدمے میں پولیس نے معمولی نوعیت کی دفعات شامل کی ہیں جس سے ملزم کا ضمانت پر رہا ہوجانا آسان سی بات ہے۔
اس کے علاوہ پولیس نے ملزم عمران کو گرفتار کرکے حوالات میں فوٹو سیشن کروایا اور مبینہ طور پر بھاری رشوت کے عوض رات کو سونے کیلئے گھر روانہ کردیا تاکہ صبح عدالت سے ضمانت دلوائی جاسکے۔
