امریکی ڈالر کی اڑان آج بھی تھم نہ سکی، ٹریڈنگ کے آغاز میں انٹر بینک مارکیٹ میں روپے کے مقابلے میں ڈالر کی قدر میں اضافہ ریکارڈ کیا گیا۔
تفصیلات کے مطابق کرنسی مارکیٹ میں پاکستانی روپیہ کے مقابلے میں ڈالر کی قدر میں مسلسل 3 دن سے اضافے کا سلسلہ برقرار ہے۔
اسٹیٹ بینک آف پاکستان کی جاری کردہ اعداد و شمار کے مطابق انٹربینک میں ڈالر 76 پیسے مہنگا ہوکر283.80 روپے پر بند ہوا۔
فاریکس ڈیلرز کا کہنا ہے کہ بینکوں نے درآمد کنندگان کو ڈالر 284.20روپے میں فروخت کیا، اوپن مارکیٹ میں ڈالر 290 روپے پر فروخت ہو رہا ہے۔
خیال رہے کہ رواں ہفتے کے دوسرے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں 3 روپے 78 پیسے کی کمی ریکارڈ کی گئی تھی۔
معاشی ماہرین کا کہنا ہے کہ روپے کے مقابلے میں امریکی ڈالر کی قدر میں تیزی کی بڑی وجہ سے اس وقت ادائیگیاں ہیں، ایل سیز کے معاملے کے بعد ڈالر کی مانگ میں اضافہ ہو رہا ہے، اس وجہ سے امریکی ڈالر قیمت میں تاریخی اضافہ ہو رہا ہے۔
