جارجیا : سابق امریکی صدر ڈونلڈ ٹرمپ نے اپنے خلاف فرد جرم کو مضحکہ خیز اور بے بنیاد قرار دیتے ہوئے کہا ہے کہ میں کبھی ہار نہیں مانوں گا۔
جارجیا میں کنونشن سے خطاب کرتے ہوئے انہوں نے کہا کہ فرد جرم عائد کرنا ایف بی آئی اور محکمہ انصاف کی انتخاب میں مداخلت کے مترادف ہے۔
اپنے خطاب میں انہوں نے اس عزم کا اعادہ کیا کہ کبھی ہار نہیں مانوں گا، اپنے مشن سے باز نہیں آؤں گا، حساس دستاویزات کو جاسوسی ایکٹ کے بجائے صدارتی ریکارڈ ایکٹ کے تحت آنا چاہیے تھا۔
ڈونلڈ ٹرمپ پر الزام ہے کہ انہوں نے امریکا کے جوہری راز سے متعلق حساس فائلیں اپنے باتھ روم اور شاور روم میں چھپائی تھیں۔
ایسا پہلی بار ہے کہ جب کسی موجودہ یا سابق کمانڈر انچیف کو وفاقی فرد جرم کا سامنا کرنا پڑ رہا ہو ، دوسری جانب مجرمانہ تحقیقات کے طوفان نے وائٹ ہاؤس میں دوسری مدت کے لیے ٹرمپ کی کوششوں کو خطرے میں ڈال دیا ہے۔
واضح رہے کہ امریکا کے سابق صدر ڈونلڈ ٹرمپ پر گزشتہ روز دوسری بار فرد جرم عائد کی گئی تھی۔ نئی فرد جرم خفیہ دستاویزات سے متعلق لاپروائی پر عائد کی گئی، وہ منگل کو میامی کی وفاقی عدالت میں پیش ہوں گے۔
دوسری جانب سابق امریکی صدر ڈونلڈ ٹرمپ نے خود کو بے قصور اور مقدمے کو جھوٹا قرار دیدیا، انہوں نے کہا کہ مجھے فرد جرم سے آگاہ کیا گیا، مقدمہ افواہوں پر مبنی ہے۔
