کراچی : سینیٹر فیصل واوڈا نے کہا ہے کہ امریکی صدر اور فیلڈ مارشل کی تاریخی ملاقات ہوئی ہے، ڈونلڈ ٹرمپ نے جیتے ہوئے سپہ سالار کو عزت دی۔
اے آر وائی نیوز سے خصوصی گفتگو کرتے ہوئے فیصل واوڈا نے کہا کہ امریکی صدر نے کبھی کسی آرمی چیف کو ایسا پروٹوکول نہیں دیا۔
فیلڈ مارشل عاصم منیر جیتے ہوئے سپہ سالار کی حیثیت سے گئے، آج ان ہی کی وجہ سے دنیا میں پاکستان کو عزت ملی۔
فیصل واوڈا نے کہا کہ امریکی صدر نے خود کہا ہے کہ فیلڈ مارشل سے ملاقات ان کیلیے اعزاز ہے، امریکی صدر نے جیتے ہوئے پاکستانی سپہ سالار کو عزت دی۔
انہوں نے کہا کہ امریکی صدر نے اپنے بیان میں جو الفاظ کہے یہ پاکستان کی کامیابی ہے، وزیراعظم شہباز شریف کا بھی شکریہ انہوں نے بہت تعاون کیا۔
ایک سوال کے جواب میں فیصل واوڈا نے کہا کہ میں نے بہت پہلے ہی کہہ دیا تھا کہ پاکستان کیلئے خوشخبریاں ہیں، فیلڈ مارشل دلیر اور ایماندار ہیں اس لیے عزت ملی ہے۔
مزید پڑھیں : عاصم منیر سے ملاقات میرے لیے اعزاز ہے، ڈونلڈ ٹرمپ
واضح رہے کہ امریکی صدر ٹرمپ نے فیلڈ مارشل عاصم منیر سے ملاقات کو’’اعزاز‘‘قرار دیتے ہوئے کہا کہ ان کو جنگ روکنے پر شکریہ کے لیے مدعو کیا تھا۔
انہوں نے بتایا کہ پاکستان کے ساتھ تجارتی معاہدے پربات چیت ہورہی ہے، آج فیلڈ مارشل عاصم منیر سے ملاقات کا اعزاز حاصل ہوا، فیلڈ مارشل عاصم منیر کا شکریہ کہ وہ جنگ کی طرف نہیں گئے۔
صدر ٹرمپ کا کہنا تھا کہ فیلڈ مارشل عاصم منیر کو جنگ روکنے پر شکریہ کے لیے مدعو کیا تھا، پاکستان اور بھارت دونوں ایٹمی طاقتیں ہیں، کشیدگی ختم ہونا مثبت ہے۔
