نیو یارک : سابق امریکی صدر ڈونلڈ ٹرمپ نے کہا ہے کہ جو بائیڈن اپنے متنازع اقدام سے دنیا کو تیسری جنگ عظیم کی جانب دھکیل رہے ہیں۔
انہوں نے خبردار کیا ہے کہ جو بائیڈن کی یوکرین کے حوالے سے پالیسی تیسری عالمی جنگ کا باعث بن سکتی ہے۔
ڈونلڈ ٹرمپ نے کہا کہ دوبارہ امریکی صدر منتخب ہونے کے فوراً بعد وہ روسی صدر ولادیمیر پوتن اور اپنے یوکرینی ہم منصب ولادیمیر زیلنسکی کو فون کریں گے اور ان سے ملاقات کرکے مسئلے کو حل کرنے کی کوشش کریں گے۔
ٹرمپ نے سوشل میڈیا پر ایک پیغام میں خبردار کیا کہ اگر آپ ان اقدامات پر نظر رکھیں جو بائیڈن یوکرین کے حوالے سے کر رہے ہیں، تو آپ کی سمجھ میں آجائے گا کہ وہ منظم اورمنظم طریقے سے تیسری عالمی جنگ کی جانب لے جا رہے ہیں، یہ کتنا بڑا پاگل پن ہے۔
رپورٹ کے مطابق انہوں نے اپنے حامیوں سے کہا کہ میں آپ کو ضمانت دیتا ہوں کہ میں اس مسئلے کو حل کرسکتا ہوں، انہوں نے فلوریڈا میں مداحوں کے ایک ہجوم سے کہا کہ ہم 24 گھنٹوں کے اندر ایک معاہدے تک پہنچ جائیں گے۔
سال 2020 کے انتخابات میں اپنے ڈیموکریٹک حریف جو بائیڈن سے ہارنے والے متنازعہ سابق امریکی صدر نے 15 نومبر 2022 کو کہا تھا کہ وہ 2024 کے صدارتی انتخابات میں حصہ لیں گے۔
