واشنگٹن: امریکا کے نو منتخب صدر ڈونلڈ ٹرمپ نے حکومت سازی کے لیے پیش رفت کرتے ہوئے کئی ناموں پر غور شروع کر دیا ہے، ایلون مسک، رابرٹ کینیڈی جونیئر اور وویک راماسوامی کے نام فائنل کر لیے گئے ہیں۔
امریکی میڈیا رپورٹس کے مطابق حکومت سازی کے سلسلے میں وزیر خارجہ کے لیے سینیٹر مارکو روبیو، وزیر دفا ع کے لیے آرمڈ سروسز کمیٹی کے چیئرمین مائیک راجر کے نام پر غور کیا جا رہا ہے، فلوریڈا میں ٹرمپ کی رہائش گاہ پر نئی انتظامیہ کے لیے انٹرویوز کا سلسلہ بھی جاری ہے۔
ٹرمپ پہلے ہی سوزی وائلز کو چیف آف اسٹاف مقرر کر کے تاریخ رقم کر چکے ہیں، صدر منتخب ہونے کے اگلے ہی دن انھوں نے اعلان کیا تھا کہ ان کی مہم کی شریک چیئر سوزی وائلز ان کی چیف آف اسٹاف ہوں گی۔ وائلز فلوریڈا کی ایک تجربہ کار سیاسی کارکن ہیں، وہ اس عہدے پر کام کرنے والی امریکی تاریخ کی پہلی خاتون ہوں گی۔
پاکستانی نژاد ری پبلکن ساجد تارڑ نے کہا ہے کہ ٹرمپ اپنی کابینہ میں ایسے لوگوں کو شامل کریں گے جو امریکا میں کرپشن کے خاتمے کے لیے کوشاں رہیں گے۔
صدارتی انتخاب کے نتائج مکمل، ٹرمپ نے تمام 7 سوئنگ ریاستوں میں کامیابی حاصل کر لی
یاد رہے کہ ہفتے کے روز اپنے ٹروتھ سوشل پلیٹ فارم پر ایک پوسٹ میں ڈونلڈ ٹرمپ نے کہا تھا کہ وہ سابق سفیر نکی ہیلی، یا سابق وزیر خارجہ مائیک پومپیو کو ٹرمپ انتظامیہ میں شامل ہونے کی دعوت نہیں دیں گے، ٹرمپ نے ماضی میں امریکا کے لیے خدمات ادا کرنے پر ان کا شکریہ بھی ادا کیا۔
