واشنگٹن: امریکی صدر ڈونلڈ ٹرمپ نے صحافیوں سے گفتگو کرتے ہوئے کہا ہے کہ ان کا ایلون مسک سے بات کرنے کا کوئی ارادہ نہیں ہے۔
روئٹرز کے مطابق امریکی صدر ڈونلڈ ٹرمپ نے جمعہ کو کہا ہے کہ ان کا ایلون مسک کے ساتھ بات کرنے کا کوئی ارادہ نہیں ہے، انھوں نے اس بات کا اشارہ دیا کہ دونوں میں ٹیکسوں میں کٹوتی کے بل پر جھگڑا جلد ختم ہونے والا نہیں۔
ایئر فورس ون پر سوار صحافیوں سے بات کرتے ہوئے ٹرمپ نے کہا کہ وہ ٹیسلا کے سی ای او کے بارے میں نہیں سوچ رہے، ایلون مسک کے ساتھ حکومتی معاہدوں کو ختم کرنے پر غور کر رہے ہیں۔
وائٹ ہاؤس کے ایک اہلکار نے نام ظاہر نہ کرنے کی شرط پر بتایا کہ ٹرمپ سرخ ٹیسلا ماڈل ایس سے چھٹکارا حاصل کر سکتے ہیں، جو انھوں نے مارچ میں وائٹ ہاؤس کے لان میں مسک کی الیکٹرک کاروں کی نمائش کے بعد خریدا تھا۔
ایلون مسک نے امریکا میں نئی سیاسی پارٹی پر رائے مانگ لی، نتائج کیا رہے؟
واضح رہے کہ ایلون مسک نے اپنی طرف سے ٹرمپ کو براہ راست مخاطب نہیں کیا تھا، تاہم وہ ریپبلکن ٹیکس اور اخراجات کے بل پر مسلسل تنقید کرتے رہے۔ اپنے سوشل میڈیا پلیٹ فارم X پر مسک نے دوسروں کی طرف سے کیے گئے تبصرے شیئر کیے، جس میں کہا گیا تھا کہ ٹرمپ کا ’’بڑا خوبصورت بل‘‘ سیاسی طور پر ریپبلکنز کو نقصان پہنچائے گا اور ملک کے 36.2 ٹریلین ڈالر کے قرض میں اضافہ کرے گا۔ انھوں نے ایک اور X صارف کی پوسٹ کی بھی توثیق کی جس میں کہا گیا تھا کہ ’’مسک نے کانگریس پر تنقید کی تھی لیکن ٹرمپ نے مسک کو ذاتی طور پر تنقید کا جواب دیا۔‘‘
روئٹرز نے ذرائع کے حوالے سے بتایا کہ مسک کے قریبی افراد کہہ رہے ہیں کہ ان کا غصہ کم ہونا شروع ہو گیا ہے اور وہ سمجھتے ہیں کہ وہ ٹرمپ کے ساتھ اپنے تعلقات کو ٹھیک کرنا چاہیں گے۔
