واشنگٹن: امریکی صدر ڈونلڈ ٹرمپ نیٹو سمٹ میں شرکت کے لیے برطانیہ جائیں گے، تھریسا مے نے خوش آئند قرار دے دیا۔
تفصیلات کے مطابق امریکی صدر ڈونلڈ ٹرمپ رواں سال دسمبر میں برطانیہ کا دورہ کریں گے اور نیٹو سمٹ میں شرکت سمیت مستقبل کے لائحہ عمل پر تبادلہ خیال کریں گے۔
غیر ملکی خبر رساں ادارے کے مطابق نیٹو اتحاد کے سیکریٹری جنرل جینز اسٹولٹینبرگ کا کہنا ہے کہ ممکنہ طور پر دسمبر میں ٹرمپ برطانیہ جائیں گے، نیٹو اتحاد سیکیورٹی چیلنجز سے نمٹنے اور عوام کے تحفظ کی خاطر حکمت عمل پر غور کرے گا۔
ان کا کہنا تھا کہ برطانیہ نیٹو کا اہم اتحادی ہے جس نے دہشت گردی سے نمٹنے اور اتحاد میں اپنا بنیادی کردار ادا کیا۔
دوسری جانب برطانوی وزیراعظم تھریسامے نے نیٹو سمٹ کی میزبانی کی پیشکش پر جنرل جینز کا شکریہ ادا کیا، ان کا کہنا تھا کہ برطانیہ نیٹو کے بانی اراکین میں شمار ہوتا ہے۔
امریکی صدر ڈونلڈ ٹرمپ سرکاری دورے پر برطانیہ پہنچ گئے
ان کا مزید کہنا تھا کہ یہ اہم موقع ہے جو پالیسی کی تبدیلی اور جدت لانے میں معاون ثابت ہوگا۔
خیال رہے کہ گذشتہ سال جولائی میں امریکی صدر ڈونلڈ ٹرمپ سرکاری دورے پر برطانیہ پہنچے تھے، ڈونلڈ ٹرمپ نے برطانوی وزیر اعظم تھریسامے اور ملکہ برطانیہ سے بھی ملاقاتیں کی تھیں۔
واضح رہے کہ امریکی صدر کے دورہ برطانیہ کے موقع پر ٹرمپ کے مخالف برطانوی شہری انوکھے احتجاج کا اعلان کیا تھا، جس میں 20 فٹ بلند ٹرمپ غبارے کو برطانوی پارلیمنٹ اسکوائر پر اڑائے جانےکا اعلان کیا گیا تھا۔
ٹرمپ کی شکل والے غبارے کی تیاری پر 20 ہزار امریکی ڈالر (24 لاکھ 32 ہزار پاکستانی روپے) لاگت آئی تھی، جسے فضا میں بلند کرنے کی اجازت حاصل کرنے کے لیے 10 ہزار برطانوی شہریوں نے دستخط کیے تھے۔
