واشنگٹن: ڈونلڈ ٹرمپ امریکا کے صدر ہی منتخب نہیں ہوئے بلکہ ان کی دولت میں بھی اضافہ ہو گیا ہے۔
تفصیلات کے مطابق امریکا کا صدر بنتے ہی ڈونلڈ ٹرمپ کے اثاثوں میں 2 کھرب 77 ارب روپے کا زبردست اضافہ ہوا ہے، مجموعی طور پر ’ٹروتھ سوشل‘ میڈیا کے حصص میں 35 فی صد اضافہ ہوا۔
سی این این نے ویب سائٹ پر اپنی رپورٹ میں یہ دل چسپ جملہ لکھا کہ ’’ٹرمپ نے صرف وائٹ ہاؤس ہی نہیں جیتا بلکہ وہ بدھ کے روز مزید دولت مند ہو گئے۔‘‘ رپورٹ میں کہا گیا کہ ڈونلڈ ٹرمپ کے صدر منتخب ہوتے ہی ان کی سوشل میڈیا کمپنی ٹروتھ سوشل کی مالیت میں ایک ارب ڈالر یعنی دو کھرب ستتر ارب 83 کروڑ 74 لاکھ روپے کا اضافہ ہوا۔
ٹرمپ میڈیا اسٹاک ’ڈی جے ٹی‘ کی مالیت میں پری مارکیٹ ٹریڈنگ میں 35 فی صد اضافہ ہوا، اور اس کی مالیت 9 ارب ڈالر ہو گئی، جون 2024 میں ٹرمپ کے اثاثوں کی مالیت 7 ارب 70 کروڑ ڈالر تھی۔ ڈونلڈ ٹرمپ قدامت پسند سوشل میڈیا کمپنی میں غالب شیئر ہولڈر ہیں، جس کی آمدنی بہت کم ہے۔
منتخب صدر کے 114.75 ملین شیئرز کی مالیت 3.9 ارب ڈالر تھی، تاہم الیکشن کے دن جب ٹریڈنگ کا اختتام ہوا تو شیئرز کی مالیت تقریباً 5.3 بلین ڈالر جا پہنچی، بلاشبہ یہ صرف کاغذی منافع ہے اور عملی طور پر ٹرمپ کے لیے قیمت کو کم کیے بغیر ان میں سے زیادہ تر حصص فروخت کرنا مشکل ہوگا۔
بلوم برگ کے مطابق ڈونلڈ ٹرمپ امریکی تاریخ کے امیر ترین صدر بن گئے ہیں، اس سے پہلے جان ایف کینیڈی ایک ارب 30 کروڑ ڈالر دولت کے ساتھ امیر ترین صدر تھے۔ ٹرمپ گولف کورسز، اعلیٰ رہائشی جائیدادوں، شراب خانے اور 1991 کے بوئنگ سیون فائیو سیون کے بھی مالک ہیں، جس کا نام ٹرمپ فورس ون ہے، ٹرمپ امریکی تاریخ میں واحد صدر ہیں جن کا دو بار مواخذہ کیا گیا ہے۔
واضح رہے کہ ڈونلڈ ٹرمپ دوسری بار امریکا کے صدر منتخب ہو گئے ہیں، امریکا نے اس بار بھی خاتون کو صدر منتخب نہیں کیا، اور کاملا ہیرس کو شکست کا سامنا ہوا، امریکا کی 50 میں سے 27 ریاستوں میں ٹرمپ فاتح قرار پایا، ان کے الیکٹورل ووٹس کی تعداد 277 ہو گئی، جب کہ کاملا ہیرس کے 224 ووٹس تھے۔
امریکا نے ایٹمی صلاحیت والا ہولناک ’منٹ مین تھری‘ میزائل کامیابی سے داغ دیا
امریکی سینیٹ میں بھی ری پبلکنز کا پلڑا بھاری رہا، اور 52 نشستیں حاصل کیں، ڈیموکریٹس کو 42 نشستیں ملیں، ایوان نمائندگان میں ری پبلکنز کی 186 اور ڈیمو کریٹس کی 160 نشستیں ہو گئی ہیں۔
ڈونلڈ ٹرمپ نے وکٹری اسپیچ میں جنگیں ختم کرنے کا اعلان کر دیا ہے، انھوں نے کہا کوئی جنگ شروع نہیں کریں گے، جنگیں ختم کریں گے، سرحدیں سیل اور امریکا کو محفوظ بنائیں گے، اب جو بھی امریکا آئے گا قانونی طریقے سے ہی آنا ہوگا۔
