واشنگٹن : امریکی صدر ڈونلڈ ٹرمپ کا کہنا ہے کہ سال کے آخر میں اپنی تنخواہ چیریٹی میں بطور عطیہ دیں گے۔
وائٹ ہاؤس کے ترجمان شان سپائسر کا بریفنگ دیتے ہوئے کہنا تھا کہ امریکی صدر ڈونلڈ ٹرمپ اپنی سالانہ تنخواہ چار لاکھ ڈالر اس سال کے آخر میں عطیہ کردیں گے، انہوں نے امریکی عوام سے عہد کیا ہے اور آپ تمام سے خواہش ظاہر کی ہیں کہ کسی ایسی چیریٹی کو تلاش کرنے میں مدد کرے جسے وہ اپنی تنخواہ عطیہ کر سکیں۔
ترجمان نے مزید کہا کہ اپنی انتخابی مہم کے دوران ٹرمپ نے کہا تھا کہ وہ تنخواہ نہیں لیں گے، وہ صرف قانونی طور پر ایک ڈالر کم از کم تنخواہ لیں گے جبکہ کوئی چھٹی بھی نہیں لیں گے۔
یاد رہے کہ ڈونلڈ ٹرمپ اور میڈیا کے روابط تلخی بھرے رہے ہیں کیونکہ اکثر ٹرمپ میڈیا کو نشانہ بناتے رہے ہیں۔
ڈونلڈ ٹرمپ کا بطور صدر تنخواہ نہ لینے کا اعلان
یاد رہے امریکا کے صدر منتخب ہونے کے بعد ڈونلڈ ٹرمپ نے اعلان کیا تھ کہ وہ بطور امریکی صدر اپنی تنخواہ سے دست بردار ہوجائیں گے اور وہ صرف امریکی قانون کے تحت مقررہ لازمی رقم یعنی سالانہ ایک ڈالر وصول کریں گے۔
خیال رہے کہ ایسا پہلی بار نہیں ہورہا جب کوئی امریکی صدر اپنی تنخوا عطیہ کر رہے ہیں، اس سےقبل صدر جان ایف کینڈی اور صدر ہربرٹ ہوور ایسا کر چکے ہیں۔
