کراچی: ڈاؤ یونیورسٹی آف ہیلتھ سائنسز کی تیار کردہ (سگ گزیدگی) کتے کے کاٹے کی ویکسین اینٹی ریبیز ویکسین ’ڈاؤ ریب‘ کی متاثرین تک رسائی ایک فون کال پر کر دی گئی۔
ڈاؤ یونیورسٹی آف ہیلتھ سائنسز کے وائس چانسلر پروفیسر محمد سعید قریشی نے ایک تقریب میں ’ڈاؤ ریب‘ کا افتتاح کیا۔ اس موقع پر ان کا کہنا تھا کہ ’ڈاؤ ریب‘ کی 30 ہزار خورا کیں تقسیم کاری کے نیٹ ورک کو فراہم کر دی گئیں ہیں جو اوجھا کیمپس میں قائم ڈاؤ انسٹیٹیوٹ آف لائف سائنسز نے درآمد شدہ خام مال سے تیار کی ہیں۔
پروفیسر محمد سعید قریشی نے اس عزم کا اظہار کیا کہ جلد ہی پاکستان میں مقامی طور پر حاصل خام مال سے بنائی جائے گی فی الحال ہم چین سے درآمد خام مال پر انحصار کرتے ہیں، چند ہفتوں میں چین حاصل کردہ خام مال سے اینٹی رے بیز ویکسین کی اضافی ایک لاکھ ستر ہزار خوراکیں بنانے کیلیے کوشاں ہیں، امید ہے اس مقصد میں کامیابی حاصل ہوگی۔
انہوں نے کہا کہ ڈاؤ یونیورسٹی نے برسوں کی عرق ریز تحقیق اور ملک کے ریگیولیٹری مراحل سے گزر کر اوجھا کیمپس میں اینٹی رے بیز ویکسین کی تجارتی پیداوار کا آغاز کیا اس کا مکمل کورس پندرہ سو روپے میں دستیاب ہوگا۔
یاد رہے کہ ڈاؤ یونیورسٹی نے کورونا وبا کے دنوں میں آئی وی آئی جی امیونو گلوبلین تیار کی تھی جس کے استعمال سے سینکڑوں مریضوں کو نئی زندگی ملی تھی۔
قبل ازیں، ایک دوسری تقریب میں ڈاؤ یونیورسٹی اور تقسیم کار نیٹ ورک ملر اینڈ فپس کے درمیان اظہار دلچسپی کی یادداشت پر دستخط کیے گئے۔ ڈاؤ یونیورسٹی کی جانب سے یادداشت پر رجسٹرار ڈاکٹر اشعر آفاق نے دستخط کیے۔ ملر اینڈ فپس مرحلہ وار پاکستان بھر میں اے آر وی ڈاؤ ریب کی دستیابی یقینی بنائے گا۔
