اسلام آباد : صدر مملکت ڈاکٹرعارف علوی کا کہنا ہے کہ اسرائیلی طیارے کی پاکستان آمد کی خبربے بنیاد ہے، اسرائیل کے ساتھ کسی قسم کے تعلقات استوارنہیں کیے جا رہے۔
تفصیلات کے مطابق ترکی روانگی سے قبل صدرمملکت نے اسلام آباد ایئرپورٹ پرمیڈیا سے گفتگو کرتے ہوئے کہا کہ کمرشل فلائٹ سے ترکی جا رہا ہوں۔
ڈاکٹرعارف علوی نے کہا کہ ترکی نے کشمیرسمیت ہرمعاملے میں ہمیشہ پاکستان کا ساتھ دیا، دنیا کی سازشوں کے باوجود ترکی میں جمہوریت قائم ہے۔
انہوں نے کہا کہ مالی بحران میں ساتھ دینے پر سعودی عرب کے شکرگزارہیں، سعودی عرب نے ہمیشہ کی طرح پاکستان کی طرف دوستی کا ہاتھ بڑھایا۔
صدرمملکت نے کہا کہ پچھلے ادوارمیں پیدا شدہ مالی بحران سے نمٹنے میں کچھ وقت لگے گا، مالی بحران میں کم سے کم سانس لینے کی کیفیت پیدا ہوئی، حکومت کوکریڈٹ جاتا ہے۔
ڈاکٹرعارف علوی نے کہا کہ اسرائیلی طیارے کی پاکستان آمد کی خبربے بنیاد ہے، اسرائیل سے تعلقات سے متعلق کوئی بات زیرغورنہیں ہے۔
انہوں نے کہا کہ پاکستان نے تاریخی اعتبارسے ہمیشہ فلسطینیوں کا ساتھ دیا، پاکستان کشمیر اور فلسطین میں مظالم دنیا کے سامنے لایا۔
صدر مملکت نے کہا کہ وزیراعظم پاکستان نومبرکے پہلے ہفتے میں چین جائیں گے، وزیراعظم کے دورہ چین میں سرمایہ کاری پربات ہوگی۔
سندھ میں گورنر راج کی خبروں سے متعلق صدر عارف علوی نے کہا کہ سندھ میں گورنرراج کی خبروں میں کوئی صداقت نہیں، سندھ کی ترقی کے لیے صوبائی حکومت سے تعاون کریں گے۔
وزیر خارجہ نے اسرائیلی طیارے کی پاکستان آمد کی خبر کو بے بنیاد قرار دے دیا
یاد رہے کہ گزشتہ روز وزیر خارجہ شاہ محمود قریشی کا کہنا تھا کہ اسرائیلی طیارے سے متعلق خبر بے بنیاد ہے جس کی تردید بھی آچکی ہے۔
