اسلام آباد : صدر مملکت ڈاکٹر عارف علوی نے کہا ہے کہ صدر ڈاکٹر عارف علوی نے پاکستان اور افریقی خطے کے درمیان امن، تعلیم، صحت تجارت، سیاحت اور موسمیاتی تبدیلی کے مشترکہ ترجیحی شعبوں میں تعاون بڑھایا جائے۔
ان خیالات کا اظہار انہوں نے اسلام آباد میں وزارت خارجہ کے زیراہتمام سفیروں کی دو روزہ کانفرنس سے خطاب کرتے ہوئے کیا، کانفرنس سے وزیر خارجہ شاہ محمود قریشی نے بھی خطاب کیا۔
صدر عارف علوی نے کہا کہ پاکستان اور افریقہ میں متعدد اقدار مشترک ہیں اور فریقین کو اپنے عوام کے امن اور خوشحالی کیلئے مل کر کام کرنے کی ضرورت ہے، فریقین کو دفاع اور تجارت کے شعبوں میں تعاون بڑھانا چاہیے۔
انہوں نے کہا کہ پاکستان ایک ابھرتی ہوئی معیشت ہے جہاں متوسط طبقہ فروغ پارہا ہے، پاکستان مواقع کی سرزمین کے طور پر ابھر کر سامنا آرہا ہے اور غیر ملکی سرمایہ کاری میں اضافہ ہورہا ہے۔ ملکی معیشت بہتر ہورہی ہے اور نئی راہیں کھل رہی ہیں۔
ڈاکٹر عارف علوی نے کہا کہ افریقہ دہشت گردی کے خلاف کامیاب جنگ سمیت پاکستان کے ماضی کے تجربات سے سیکھ سکتا ہے، افریقہ کے ساتھ ہمارے تعلقات میں مزید بہتری آنی چاہئے۔
کانفرنس کے اقدام کو سراہتے ہوئے صدر نے کہا کہ اس طرح کی کانفرنسوں کا انعقاد تعاون اور رابطوں کے لئے قابل قدر مواقع فراہم کرتا ہے، ہم افریقی ممالک کے ساتھ اپنے تعلقات بہتر بنانے کا سلسلہ جاری رکھیں گے۔
کانفرنس سے خطاب کرتے ہوئے وزیر خارجہ شاہ محمود قریشی نے کہا کہ پاکستان افریقی ملکوں کے ساتھ یکساں ترقی اور خوشحالی کے باہمی اصولوں کی بنیاد پر روابط بڑھانے کا خواہاں ہے۔
انہوں نے کہا کہ ہم نے اقتصادی سفارتکاری کا آغاز کیا ہے جس کے تحت ہم معیشت کے مختلف شعبوں میں برآمدات میں اضافے اور معیشت کو مستحکم کرنے کیلئے پرعزم ہیں۔
