لاہور : تحریک منہاج القرآن کے سربراہ ڈاکٹر محمد طاہرالقادری نے کہا ہے کہ کاش اس نظام میں غریب اور امیر کیلئے پیمانہ ایک جیسا ہوتا، ایک جان کا جتنا خیال رکھا گیا کاش14جانوں کا بھی رکھا جاتا۔
ان خیالات کا اظہار انہوں نے اپنے ایک بیان میں کیا، ڈاکٹر محمد طاہرالقادری نے کہا کہ پاکستان کے قانونی، عدالتی اور ریاستی نظام نے جتنا خیال ایک انسانی جان کا رکھا ہے کاش یہ نظام اتنا ہی خیال سانحہ ماڈل ٹاؤن میں شہید کی جانے والی 14 جانوں اور سانحہ ساہیوال کی چار جانوں کا بھی رکھتا۔
انہوں نے کہا کہ پانچ سال کے بعد سانحہ ماڈل ٹاؤن کی شروع ہونے والی غیرجانبدارانہ واحد تفتیش کو بھی روک دیا گیا، اس نظام میں مظلوموں کی غیر جانبدار تفتیش کو بھی مکمل ہونے کی اجازت نہیں ہے۔ یہ تفتیش اس لیے معطل ہے کہ مدعی بیٹھا نہ گواہوں نے سرنڈر کیا۔
انہوں نے کہا کہ جتنا خیال اس نظام نے ایک انسانی جان کا رکھا کاش یہ نظام اتنا ہی خیال سانحہ ساہیوال کی سات انسانی جانوں کا بھی رکھتا جن کے سارے قاتل بری ہو گئے ہیں کیونکہ ملزمان کے خلاف اس نظام میں کوئی شہادت اور گواہی دستیاب نہیں ہوتی۔ کاش اس نظام میں غریب اور امیر کیلئے پیمانہ ایک جیسا ہوتا۔
انہوں نے کہا کہ جن غریبوں نے ماڈل ٹاؤن کے شہیدوں کے بے گناہ قتل پر احتجاج کیا تھا وہ سوا سو افراد پنجاب کی جیلوں میں پانچ پانچ سال کی قید کی سزا بھگت رہے ہیں۔
