لاہور : وزیر صحت پنجاب ڈاکٹر یاسمین راشد نے کہا ہے کہ شہبازشریف کڈنی اینڈ لیور انسٹیٹیوٹ سے متعلق غلط بیانی کررہے ہیں، ہم ن لیگ حکومت سے بہتر پی کے ایل آئی کو چلارہے ہیں۔
ان خیالات کا اظہار انہوں نے شہبازشریف کا پاکستان کڈنی اینڈ لیور انسٹیٹیوٹ سے متعلق بیان پر صحافیوں کو رد عمل دیتے ہوئے کیا۔
ڈاکٹر یاسمین راشد نے کہا ہے کہ ہماری حکومت ن لیگی حکومت کی نسبت پی کے ایل آئی کو بہترین طریقے سے چلارہی ہے،ن لیگ دور میں پی کے ایل آئی میں لیور ٹرانسپلانٹ ممکن ہی نہ ہوسکا تھا۔
ان کا کہنا تھا کہ ان ڈور اور آؤٹ ڈور میں مریضوں کی تعداد میں3گنا اضافہ ہوا، ڈائیلسز مشینوں کی تعداد60کردی، روز180مریضوں کا مفت علاج ہوتا ہے۔ شہباز شریف کڈنی اینڈ لیورانسٹیٹیوٹ سے متعلق غلط بیانی کررہے ہیں۔
وزیر صحت پنجاب کا مزید کہنا تھا کہ پی کے ایل آئی میں8نئے آپریشن تھیٹرز بالکل فعال ہیں۔ اسپتال میں پیٹ اسکین، سٹی سکین کی مفت سہولت موجود ہے، شہبازشریف غلط بیانی سے پہلے حقائق جاننے کی جسارت کرلیا کریں۔
