اسلام آباد: معاون خصوصی برائے صحت ڈاکٹر ظفر مرزا کا کہنا ہے کہ کرونا وائرس کے مشتبہ 25 افراد کے نمونے نیگیٹو آئے ہیں، ان میں کرونا وائرس کی تشخیص نہیں ہوئی۔
تفصیلات کے مطابق معاون خصوصی برائے صحت ڈاکٹر ظفر مرزا کی زیر صدارت کرونا وائرس پر جائزہ اجلاس ہوا، اجلاس میں وفاقی سیکریٹری صحت ڈاکٹر اللہ بخش ملک، پاک فوج کے نمائندے، یونیسف اور یو ایس ایڈ کے ارکان بھی شریک ہوئے۔
اجلاس میں میجر جنرل عامر اکرام نے کرونا وائرس سے بچاؤ کے اقدامات پر بریفنگ دی۔ انہوں نے بتایا کہ پاکستان میں اس وقت تک کرونا وائرس کا کوئی کیس نہیں۔
انہوں نے بتایا کہ تعینات عملے کو قومی ادارہ صحت کی طرف سے تربیت دی گئی ہے۔
معاون خصوصی ڈاکٹر ظفر مرزا نے کہا کہ کرونا وائرس سے بچاؤ کے تمام اقدامات کیے جا رہے ہیں، بندر گاہوں پر انٹرنیشنل ریگولیشن کے تحت عمل درآمد کو یقینی بنایا ہے۔
انہوں نے کہا کہ عوام کو تحفظ دینے کے لیے ہنگامی بنیادوں پر اقدامات کیے جا رہے ہیں۔ قومی ادارہ صحت کو 25 کیسز کے سیمپل موصول ہوئے جو نیگیٹو ہیں۔
ڈاکٹر ظفر مرزا نے کہا کہ تمام بین الاقوامی اداروں نے مکمل تعاون کا یقین دلایا ہے، وائرس سے بچنے کے لیے صوبوں سے مل کر مربوط اقدامات کیے۔ وزارت صحت میں ایمرجنسی آپریشن سیل بنایا ہے جو صورتحال دیکھ رہا ہے۔
انہوں نے کہا کہ کرونا وائرس پر ایمرجنسی کور گروپ روزانہ کی بنیاد پر صورتحال کا جائزہ لیتا ہے، تمام ایئر پورٹس اور داخلی مقامات پر اسکریننگ کو مضبوط بنایا ہے۔ حکومت چین سے رابطے میں ہیں، صورتحال پر کڑی نظر ہے۔
ڈاکٹر ظفر مرزا نے مزید کہا کہ پاکستان آنے والے مسافروں کے لیے ہیلتھ ڈکلیئریشن فارم لازمی قرار دیا ہے۔
