اسلام آباد: معاون خصوصی برائے صحت ڈآکٹر ظفرمرزا کا کہنا ہے کہ نرسنگ کا شعبہ صحت کے شعبے میں ریڑھ کی ہڈی کی حیثیت رکھتا ہے۔
تفصیلات کے مطابق وزیراعظم کے معاون خصوصی صحت ڈاکٹر ظفرمرزا نے پاکستان نرسنگ کونسل کا دورہ کیا، رجسٹرار پی این سی نے ڈاکٹر ظفرمرزا کو ادارے کی کارکردگی اور درپیش چیلنجز پر بریفنگ دی۔
معاون خصوصی نے کہا کہ نر سنگ کے شعبے میں ترقی کے لیے تیزی سے اصلاحات جاری ہیں، نرسنگ کا شعبہ صحت کے شعبے میں ریڑھ کی ہڈی کی حیثیت رکھتا ہے۔
ڈاکٹر ظفرمرزا نے کہا کہ ملک کو اس وقت نرسنگ کی کمی کا سامنا ہے، گزشتہ 70 برسوں میں شعبہ نرسنگ کو نظر انداز کیا گیا۔
انہوں نے کہا کہ شعبہ صحت میں اصلاحات کے لیے پاکستان نرسنگ کا اہم کردار ہے، وزارت صحت نرسنگ کے شعبے پر خصوصی طور پر توجہ دے رہی ہے۔
صحت کے شعبے میں حقیقی معنوں میں انقلابی تبدیلیاں لارہے ہیں، ڈاکٹرظفر مرزا
یاد رہے کہ 12 جولائی کو معاون خصوصی برائے صحت ظفرمرزا کا کہنا تھا کہ عوام کو بنیادی صحت کی سہولیات کی فراہمی کو یقینی بنانے کے لیے تمام وسائل بروئے کار لائیں گے۔
ڈاکٹر ظفر مرزا کا کہنا تھا کہ صحت کے شعبے میں حقیقی معنوں میں انقلابی تبدیلیاں لا رہے ہیں۔
