کراچی: پاکستان ٹیلی ویژن نیٹ ورک (پی ٹی وی) کا مقبول ترین ڈرامہ ’دھوپ کنارے‘ اب عربی زبان میں ڈب کرکے سعودی عرب میں نشر کیا جائے گا۔
بین الاقوامی میڈیا رپورٹ کے مطابق گزشتہ سال 2019 میں پاکستان اور سعودی عرب کے مابین تعلقات مضبوط کرنے کے لیے پاکستانی ڈرامے عربی زبان میں ڈب کرکے سعودی عرب میں نشر کیے جانے کا فیصلہ کیا گیا تھا اور یہ وزیر سائنس اینڈ ٹیکنالوجی فواد چوہدری کے دورے کے بعد اسلام آباد اور ریاض کے درمیان شروع کردہ کلچرل ایکسچینج پروگرام کا ایک حصہ تھا۔
اس منصوبے کے تحت پاکستان کے تین مقبول ترین ڈراموں کو شاٹ لسٹ کیا گیا تھا جن میں دھوپ کنارے، تنہائیاں اور آہٹ شامل تھے۔
Pak Dramas Dubbing in Arabic resumes, to be shown in KSA
It follows former information minister Fawad Chaudhry’s visit to the Saudi capital last year wherein he had announced Islamabad’s plans to exports its television series to the Kingdom soon. https://t.co/CCV1rXSjmp— Ch Fawad Hussain (@fawadchaudhry) June 24, 2020
سرکاری ٹی وی چینل کے دو ڈراموں تنہائیاں اور آہٹ کی عربی ڈبنگ تاخیر کا شکار ہوئی تاہم ڈرامہ دھوپ کنارے کی عربی زبان میں ڈبنگ مکمل کرلی گئی ہے اور اب یہ ڈرامہ سعودی عرب میں نشر ہونے کے لیے تیار ہے۔
اس ضمن میں پی ٹی وی کنٹرولر بین الاقوامی امور کا کہنا ہے کہ ابھی یہ واضح نہیں ہے کہ دیگر دونوں ڈراموں پر کب زیر التوا کام دوبارہ شروع کیا جائے گا۔
فواد چوہدری نے بھی ٹویٹر پر اس بات کا اعلان کیا کہ ڈرامہ ’دھوپ کنارے‘ عربی زبان میں ڈب کرکے سعودی عرب میں نشر ہونے کے لیے تیار ہے۔
واضح رہے کہ یہ پہلا پروجیکٹ ہے کہ جب پاکستان کے مقامی ڈراموں کو عربی زبان میں ڈب کرکے سعودی عرب کے ناظرین کے لیے نشر کیا جائے گا۔
اِس سے قبل وزیراعظم پاکستان عمران خان کی ہدایت پر شہرہ آفاق ترک سریز ’ارطغرل غازی‘ کو اُردو زبان میں ڈب کرکے سرکاری ٹی وی چینل پر نشر کیا جارہا ہے جس کے سحر میں پاکستانی عوام جکڑے ہوئے ہیں۔