تازہ ترین

فوجی عدالتوں سے 15 سے 20 ملزمان کے رہا ہونے کا امکان

اسلام آباد : اٹارنی جنرل نے فوجی عدالتوں سے...

نیا کپتان کون؟ سفارشات چیئرمین پی سی بی کو ارسال

پاکستان کرکٹ ٹیم کا وائٹ بال میں نیا کپتان...

وفاقی حکومت نے آٹا برآمد کرنے کی اجازت دے دی

وفاقی حکومت نے برآمد کنندگان کو آٹا برآمد کرنے...

وزیراعظم شہباز شریف آج چیف جسٹس قاضی فائز عیسٰی سے اہم ملاقات کریں گے

اسلام آباد : وزیراعظم شہبازشریف اور چیف جسٹس سپریم...

یومِ وفات: معروف ڈرامہ نگار حسینہ معین سے یادگار گفتگو

حسینہ معین کا شمار پاکستان کے صفِ اوّل کے ڈرامہ نگاروں میں ہوتا ہے۔ وہ حسینہ آپا کے نام سے مشہور تھیں۔

آج پاکستان کی اس نام وَر ڈرامہ نگار اور کئی مقبول کہانیوں کی اِس مصنّف کی برسی ہے۔ حسینہ معین 2021ء میں آج ہی کے دن کراچی میں انتقال کر گئی تھیں۔ ان کی عمر 79 برس تھی۔

یہاں ہم فیچر رائٹر اور مضمون نگار شائستہ زریں کی حسینہ آپا سے کی گئی ایک گفتگو نقل کر رہے ہیں‌ جس سے قارئین کو حسینہ معین کے فنی سفر اور یادگار ڈراموں کے ساتھ پاکستانی عورت، اپنے معاشرے اور تہذیب و روایات سے متعلق ان کے خیالات جاننے کا موقع ملے گا۔ ملاحظہ کیجیے۔

بلاشبہ حسینہ معین کے ڈراموں کے طفیل صنفِ نازک نے آگے قدم بڑھانا ہی نہیں قدم جمانا بھی سیکھا۔ حسینہ معین کے بعض کرداروں میں مماثلت بھی پائی جاتی ہے، مثلاً نڈر اور بے باک ہیروئن، وہ ہیرو جس کے مزاج میں متانت اور شرارت کی آمیزش ہو، ایک ہونق سا کامیڈین، بے حد شرارتی اور حاضر جواب لڑکی جوعموماً ہیروئن کی سہیلی یا بہن ہوتی ہے، لیکن باوصف اس کے حسینہ معین کے ہر ڈرامے کی کہانی اور کرداروں میں تازگی اور ندرت محسوس ہوتی ہے اور کسی بھی نئے ڈرامے میں اس مماثلت کے باوجود پرانے کردار کی جھلک نظر نہیں آتی۔ اس کی مثال ہیں کرن کہانی کے ڈاکٹر سلیمان اور دھوپ کنارے کے ڈا کٹر احمر۔ انکل عرفی کی بینا اور تنہائیاں کی زارا۔ انکل عرفی کے حسنات بھائی اور تنہائیاں کا قباچہ۔ انکل عرفی کی افشین اور تنہائیاں کی سنیعہ۔ کرن کہانی کا عرفان اور بندش کا خالد۔ انکل عرفی کے انکل عرفی اور بندش کے شعیب انکل۔ پرچھائیاں اور دھوپ کنارے کے بابا۔ ان تمام کرداروں میں محسوس کیا جانے والا نمایاں فرق ہی دراصل حسینہ معین کے کمالِ فن کی دلیل ہے۔

ان کے ڈراموں کے موضوعات سنجیدہ، حساس لیکن مکالمے شوخ، برجستہ، بامحاورہ گفتگو پر مبنی، چبھتے ہوئے فقرے ہوتے ہیں۔ چونکہ آپ تاریخ کی طالبہ رہ چکی ہیں اس لیے کچھ تاریخی حوالے بھی ملیں گے۔

ان کہی کا جبران کتنا مضبوط کردار تھا۔ حسینہ معین کے قلم کی مشاقی کہ گہری، جاندار اور بڑی سے بڑی بات چھوٹے سے جملے میں اپنے کردار کی زبانی کہلوا دیں گی۔ مثلاً کہانی ختم ہوگئی، ناجیہ بابا چلے گئے۔ مصروفیت بہت اچھی پناہ گاہ ہے۔ باہمّت اور بے حس ہو نے میں بڑا فرق ہے۔ آپ نے ’’ان کہی“ میں ایک کردار کی زبانی کہلوایا تھا کہ” بعض سمندر دلوں میں بھی ہوتے ہیں جن پر کہانیاں لکھی ہوتی ہیں۔“ اور ان کے مزاح سے بھرپور ڈراموں میں بھی دلوں پر لکھی ہوئی کہانیاں جذبوں کی شدت اور گہرائی کے ساتھ نہ صرف موجود ہوتی ہیں بلکہ اپنا اثر بھی دکھاتی ہیں۔ اگر حسینہ معین کے دل چسپ اور پرمزاح مکالمے ہنساتے ہیں تو اُن کے سنجیدہ مکالمے دلوں کی کہانیاں پڑھنے کا حوصلہ بھی عطا کرتے ہیں۔ عشق کے جذبے کو حسینہ معین نے بڑے سلیقے اور تہذیب کے ساتھ اپنے ڈراموں میں پیش کیا ہے۔ یہ بھی ان کا امتیاز ہے کہ ان کی ہیروئن بے باک ہونے کے باوجود باوقار نظر آتی ہے۔

حسینہ معین نے پاکستانی فلموں نزدیکیاں، کہیں پیار نہ ہو جائے، یہاں سے وہاں تک کے مکالمے بھی لکھے۔ حسینہ معین نے اپنے ڈراموں کی داد محض ناظرین ہی سے وصول نہیں کی بلکہ حکومتِ پاکستان کی جانب سے تمغائے حسنِ کارکردگی بھی حاصل کیا۔ امریکہ کی hopkins یونیورسٹی کی جانب سے اپنے ڈرامے آہٹ پر ایوارڈ حاصل کیا اور یہ حسینہ معین کے لیے ہی نہیں ہمارے لیے بھی یہ باعثِ افتخار ہے کہ ورلڈ بک 1992ء میں ان کا نام شامل ہوا۔ حسینہ معین نے نگار اور گریجویٹ ایوارڈ بھی حاصل کیے۔ فنِ ڈرامہ نویسی پر متعدد سرکاری اور غیر سرکاری تنظیموں کی جانب سے اعزازات پائے۔

پاکستان کی اس نام وَر ڈرامہ نویس نے جامعہ کراچی سے تاریخ میں ایم اے کیا تھا۔

ہم نے حسینہ معین سے اُن کے ڈرامہ نگاری کے سفر پر بات کی تو انہوں نے بتایا کہ میری کالج اساتذہ سلمیٰ شان الحق حقی اور بسم اللہ نیاز نے محسوس کرلیا تھا کہ میں لکھنے کی صلاحیت رکھتی ہوں۔ میں سیکنڈ ایئر کی طالبہ تھی۔ اُنہوں نے ہی مجھے جشن طلباء (ریڈیو پاکستان کراچی مرکز) کے لیے ڈرامہ لکھنے کو کہا تھا مگر میں نے اسے مشکل کام کہہ کر انکار کر دیا تھا۔ یہ انکار ان کے اصرار کے آگے ٹھہر نہ سکا۔ انہوں نے کہا ”کچھ بھی ہو تم ہی لکھو گی۔“ میں اُن کی بات رد نہ کرسکی۔ کالج میں ہی بیٹھ کر ڈرامہ لکھا جسے پہلا انعام ملا۔ پھر یہ سلسلہ چل نکلا اور اسٹوڈیو نمبر 9 کے لیے میں نے آٹھ، نو ڈرامے لکھے جنھیں بے حد پسند کیا گیا۔ جب کراچی ٹیلیویژن اسٹیشن بنا تو وہاں کے جنرل منیجر نے میرا ایک ریڈیو ڈرامہ ”بُھول بھلیاں“ لے کر مجھ سے کہا کہ اسے ٹی وی کے لیے لکھ دیں۔اس طرح ڈرامائی سلسلے ”ارژنگ“ میں میرا پہلا ٹی وی ڈرامہ ”نیا راستہ“ تھا۔ انہوں نے ٹی وی کے لیے کئی ماخوذ ڈرامے لکھے۔ اپنے اوّلین طبع زاد ڈرامے کے بارے میں ان کا کہنا تھا کہ ٹی وی کے لیے میرا پہلا طبع زاد ڈرامہ ”ہیپی عید مبارک“ تھا۔ یہ کھیل 1971ء کی جنگ کے بعد مجھ سے لکھوایا گیا تھا اور ناظرین کو بے حد پسند آیا جب کہ سچ تو یہ ہے کہ ٹیلی کاسٹ ہوا تو مجھے اس میں بہت سی خامیاں نظر آئیں مگر رائے عامہ یکسر مختلف تھی۔ ٹیلیویژن حکام نے ہیپی عید مبارک کو بہترین ڈرامہ قرار دیتے ہوئے ایک تقریب میں مجھے ایوارڈ بھی دیا۔

ڈرامے کی بنیادی تکنیک، اسلوب، منظر نگاری اور کردار نگاری کے ضمن میں وہ کہتی ہیں، پلاٹ، مسئلہ، مسئلے کا حل، کردار اِن تمام چیزوں کو ساتھ لے کر ڈرامہ بنتا ہے۔ کہانی تو ہوتی ہی ہے، میں کردار نگاری کو سب سے زیادہ اہمیت دیتی ہوں۔

انہوں نے اپنے تخلیق کردہ پسندیدہ نسوانی کرداروں اور خواتین کی فلاح اور ترقی میں ٹی وی ڈرامے کے مؤثر کردار سے متعلق کہا کہ ”انکل عرفی“ میں بینا کا، ”سنگسار“ اور ”پرچھائیاں“ میں ساحرہ کے کردار مجھے بہت پسند ہیں۔ میرے تجربہ تو یہی بتاتا ہے کہ خواتین کی خوش حالی اور ان کی ترقی میں ڈرامہ سے بڑی مدد مل سکتی ہے۔ امریکہ کی hopkans یونیورسٹی نے پاپولیشن کے حوالے سے مجھ سے ڈرامہ آہٹ لکھوایا تھا اور ساحرہ کاظمی سے بنوایا تھا۔ میں سمجھتی ہوں کہ خواتین کی صحّت کے حوالے سے یہ ڈرامہ کام یاب رہا تھا۔ پی ٹی وی سے چند سال پیشتر قسط وار ڈرامہ شروع ہوا تھا، ”شاید کہ بہار آجائے“ خواتین کے مسائل پر یہ بھی ایک کام یاب ڈرامہ تھا۔ نجی ٹی وی چینل سے 80 منٹ کا ڈرامہ دُعا نشر ہوا تھا، یہ بھی خواتین کے اہم مسئلے کی عکاسی کر رہا تھا۔ چند برس قبل عورت فاؤنڈیشن نے مجھ سے دو ڈرامے لکھوائے جو کئی اقساط پر مبنی تھے اور پنجاب ریڈیو اسٹیشن سے نشر ہوئے۔ ان میں ایک ڈرامہ زراعت میں عورت کے کردار اور دوسرا صحت میں عورت کے کردار پر تھا۔ میں تو کہتی ہوں کہ یہ بہت مضبوط میڈیم ہے۔ میرے ڈراموں کی پُراعتماد لڑکیوں کے کردار بہت اثرانگیز ثابت ہوئے۔

میڈیا پالیسی، سنسر شپ اور مختلف سماجی رکاوٹوں کی وجہ سے لکھنے یا نہ لکھنے سے متعلق ان کا کہنا تھا کہ ایسے بہت سے موضوعات ہیں جن پر ہم لکھنا چاہتے ہیں لیکن بہت سے عوامل مثلاً مذہب، سیاست، معاشرہ وغیرہ درمیان میں آتے ہیں۔ اس لیے ان موضوعات کو نہیں چھیڑتے، حالانکہ زندگی میں جو کچھ ہے، وہ ادب میں ضرور شامل ہونا چاہیے۔ یہ ہماری بدقسمتی ہے کہ ہم زندگی کے راستے پر آنکھیں بند کر کے گزرتے ہیں۔ غیر ضروری سنسر سے اچھے بھلے ڈرامے کا تأثر ختم ہو جاتا ہے۔ اگر مجھے کوئی پیغام دینا ہوگا تو میں کسی نہ کسی طرح یہ گنجائش نکال لوں گی کہ وہ بات کہہ سکوں جو کہنا چاہتی ہوں، دستبردار ہونا میں نہیں جانتی۔

اپنے ڈرامے ”پل دو پل“ کی ناکامی کا جواز دیتے ہوئے انہوں نے کہا، پل دو پل ناکام نہیں تھا مگر آج کل اتنے زیادہ سیریل آرہے ہیں کہ کوئی بھی بھرپور اور مکمل کام یاب ثابت نہیں ہوتا۔ لوگ چینل بدلتے رہتے ہیں۔ وہ soft سیریل تھا اس میں چونکا دینے والے واقعات نہ تھے، سماجی موضوع نہ تھا، در اصل وہ ڈرامہ سکون سے دیکھا جانے والا تھا اور اس طرح دیکھا نہ گیا۔ شاید آپ کو یاد ہو کہ جب پڑوسی ٹیلی کاسٹ ہوا تھا تو اسے کمزور قرار دیا گیا اور جب ری ٹیلی کاسٹ ہوا تو اسی ڈرامے کو بے حد پسند کیا گیا۔

حسینہ معین کا ڈرامہ دیس پردیس بھی بہت پسند کیا گیا تھا۔ انہوں نے کہا کہ تسمینہ شیخ اور ذوالفقار شیخ نے اسکاٹ لینڈ میں مقیم پاکستانیوں کے مسائل کی جانب میری توجہ مبذول کروائی۔ تسمینہ کی خواہش پر میں خود اسکاٹ لینڈ گئی۔ اُن کے مسائل اور مصائب کا اندازہ کیا اور پوری شدّت کے ساتھ محسوس کیا۔ اُن کی حماقتوں پر دکھ بھی ہوا، غصّہ بھی آیا، اور اُن کے جذبات و احساسات کو کہانی کے قالب میں ڈھال لیا۔

اپنے ڈراموں میں عشق و محبّت کے معاملات میں تہذیب اور اپنے نظریۂ محبّت کے بارے میں انہوں نے انٹرویو کے دوران بتایا محبّت بہت عظیم جذبہ ہے جو انسانوں کو عطا ہوا ہے۔ جہاں گھٹیا پن ہو وہ عشق یا محبت نہیں سستی جذباتیت ہے اور میرا یہ نظریہ میرے ڈ راموں میں بھی نمایاں ہے، اس لیے ان معاملات میں تہذیب نظر آتی ہے۔

پروڈکشن ہاؤسز کی تعداد میں اضافے کے باوجود کمزور ڈرامے کی بابت اظہارِ رائے کے دوران ان کا کہنا تھاکہ اگر کوئی کام خلوصِ نیّت سے نہ کیا جائے تو اس میں بھی کام یابی نہیں ملتی۔ اب پی ٹی وی میں ڈرامہ بنانے والے لوگ وہ نہیں رہے، نئے لوگ آگئے۔ اس کے علاوہ اب یہاں بھی پرائیوٹ پروڈکشن ہاؤسز سے ڈرامے خریدے جاتے ہیں، ان کے معیار کی چھان بین نہیں کی جاتی تو معیار کیسے قائم رہ سکتا ہے؟ پی ٹی وی بھی اب اتنا جان دار نہیں رہا۔ یہاں تو یہ حال ہے کہ جس کے پاس پیسہ ہے اُس نے پروڈکشن ہاؤس بنا لیا ہے۔ جب یہ حال ہو تو مضبوط اور کام یاب ڈرامہ کیسے بن سکتا ہے۔

پاکستانی ڈرامے کی بازیابی کے لیے محنت اور کوشش کرنی پڑے گی، جن لوگوں نے اسے بگاڑا ہے وہ اس جانب توجہ دیں گے تو اس طرح جو بھرمار ہورہی ہے اس کا خاتمہ ہو جائے گا۔ جو اہلِ قلم اور فن کار صحیح معنوں میں باصلا حیت ہیں وہ ایک بار پھر سامنے آئیں گے۔

ہمارے معاشرے میں ورکنگ ویمن کے مقام اور حقوقِ نسواں سے متعلق ان کا کہنا تھاکہ دراصل کسی بھی معاشرے میں ورکنگ ویمن کو وہ مقام حاصل نہیں ہے جو مردوں کو حاصل ہے۔ عورت دو وجوہات کی بنا پر ملازمت کرتی ہے، ایک تو اس کی معاشی ضرورت اسے مجبورکرتی ہے، دوسرے وہ تعلیم حاصل کر کے جوکچھ سیکھتی ہے اسے برتنا چاہتی ہے۔ ایک ورکنگ ویمن کا سب سے بڑا مسئلہ یہی ہے کہ مرد یہ برداشت ہی نہیں کر سکتا کہ عورت سے گھریلو ذمہ داری میں کہیں کوتاہی ہو جائے، اس اعتبار سے عورت پر دہری ذمہ داری اور بوجھ ہوتا ہے کیون کہ ہمارے مشرقی معاشرے میں مرد گھریلو کام کرنا اپنی شان کے خلاف سمجھتے ہیں جب کہ مغربی معاشرے میں مرد کسی حد تک عورت کا ہاتھ بٹاتے ہیں۔ مشرق کی ورکنگ ویمن کا یہ سفر بہت مشکل ہوتا ہے۔

نوآموز ڈرامہ نگاروں کی راہ نمائی کے لیے حسینہ معین کا پیغام تھاکہ وہ محنت کریں، پڑھیں، ڈرامے پڑھیں، ڈرامے کی Definition میں رہ کر ڈرامہ لکھیں، میانہ روی اختیار کریں، تیز دوڑنے کی کوشش نہ کریں۔

Comments

- Advertisement -