اسلام آباد : ڈرگ ریگولیٹری اتھارٹی آف پاکستان (ڈریپ) نے بخار اور جسمانی درد کے علاج کی دوا کا ایک بیچ غیر معیاری قرار دے دیا۔
تفصیلات کے مطابق ڈرگ ریگولیٹری اتھارٹی نے سینٹرل ڈرگس لیبارٹری کراچی کی رپورٹ پر کارروائی کرتے ہوئے درد اور بخار میں استعمال کی جانے والی دوا سیٹا فنڈانفیوژن کا ایک بیچ غیر معیاری قرار دے دیا جس کا بیچ نمبر بیچ 23 آر سی 55 ہے۔
ڈریپ نے متعلقہ کمپنی کو فوری طور پر غیرمعیاری دوا مارکیٹ سے اٹھانے کی ہدایت کردی، مزید براں ڈریپ نے ملک میں فروخت ہونے والی غیر معیاری ادویات کے خلاف کارروائی مزید تیز کردی۔
سینٹرل ڈرگ لیب کراچی نے سیٹافنڈانفیوژن کاایک بیچ غیرمعیاری قرار دیا، ڈریپ کی جانب سے سیٹا فنڈانفیوژن ڈرپ ری کال الرٹ کا اجراء معلومات عامہ کیلئے کیا گیا ہے، اس دوا کا بیچ 23 آر سی 55غیر معیاری قرار پایا۔
الرٹ کے مطابق سیٹافنڈ انفیوژن کی ڈرپس میں غیر متعلقہ ذرات پائے گئے ہیں، سیٹافنڈ انفیوژن پیرا سیٹامول سے تیارکردہ بخار، جسمانی درد کی دوا ہے۔
ڈریپ کا کہنا ہے کہ غیرمعیاری سیٹافنڈ انفیوژن کا استعمال ری ایکشن کرسکتا ہے اور اس سے خون میں کلاٹس بن سکتے ہیں، مذکورہ دوا فرینڈز فارما سیوٹیکل لاہور کی تیارکردہ ہے۔
ڈریپ نے کمپنی کو سیٹافنڈ کا متاثرہ بیچ مارکیٹ سپلائی نہ کرنے کی ہدایت کرتے ہوئے کہا ہے کہ کمپنی مارکیٹ اسٹاک سے متاثرہ بیچ واپس اٹھالے، فارمیسیز سیٹافنڈ کے متاثرہ بیچ کی سیل روکنے کیلئے اسٹاکس کو چیک کریں۔
ڈرگ ریگولیٹری اتھارٹی نے مزید کہا کہ کیمسٹ سیٹافنڈ انفیوژن کا متاثرہ بیچ کمپنی کو فوری طور پر واپس بھجوائیں، ڈاکٹرز بھی مریضوں کو یہ دوا استعمال نہ کرائیں۔
