اسلام آباد: وفاقی وزیر سائنس اینڈ ٹیکنالوجی فواد چوہدری نے کہا ہے کہ ڈریپ نے وینٹی لیٹرز کی تیاری کے لیے برطانوی معیار اپنانے کا فیصلہ کیا ہے۔
اے آر وائی نیوز کے مطابق وفاقی وزیر فواد چوہدری نے اپنے ٹویٹر اکاؤنٹ پر پیغام میں کہا کہ وینٹی لیٹرز کے مزید ڈیزائنز انجینئرنگ کونسل اور ڈریپ کو موصول ہو چکے ہیں، جن کی تفصیلات ڈریپ کی ویب سائٹ پر مہیا کر دی گئی ہیں۔
فواد چوہدری نے لکھا کہ کوالٹی کلیئرنس مکمل ہوتے ہی وینٹی لیٹر بنانے شروع کر دیں گے۔ خیال رہے کہ گزشتہ ہفتے وفاقی وزیر نے کہا تھا کہ تیار شدہ وینٹی لیٹرز کے کلینیکل ٹرائلز 3 اسپتالوں، جناح اسپتال لاہور، انڈس اسپتال کراچی اور سی ایم ایچ راولپنڈی میں ہوں گے۔
کرونا کا علاج، پلازما تھراپی کے کلینکل ٹرائل کی اجازت مل گئی
دوسری طرف ڈرگ ریگولیٹری اتھارٹی آف پاکستان نے کرونا علاج کے لیے پلازما تھراپی کے کلینکل ٹرائل اور مقامی طور پر تیار وینٹی لیٹرز کے کلینیکل ٹرائلز کی اجازت بھی دے دی ہے۔ وینٹی لیٹرز پاکستان انجینئرنگ کونسل نے تیار کیے۔ ڈریپ نے کلوروکوئین کے خام مال کی مقامی طور پر تیاری کی بھی اجازت دی ہے۔
وینٹیلیٹرز کے مزید ڈیزائن انجینرنگ کونسل اور ڈراپ کو موصول ہو ئے ہیں ڈراپ نے وینٹیلیٹرز کیلئے UK standards اپنانے کا فیصلہ کیا ہےاس حوالے سے تفصیلات ڈراپ کی website پر مہیا کر دی گئ ہیں۔ جوں ہی کوالٹی کلئرینس کا عمل مکمل ہوتا ہے Manufacturing شروع ہو جائیگی۔ #CoronaInPakistan
— Ch Fawad Hussain (@fawadchaudhry) April 9, 2020
ڈریپ نے 50 سے زائد کمپنیوں کو ہینڈ سینی ٹائزر کی تیاری کی اجازت بھی دے دی ہے، مقامی کمپنیوں کو سینی ٹائزر بنانے کی اجازت 3 ماہ کے لیے دی گئی ہے، لائسنس یافتہ کمپنیوں کو لوکل سینی ٹائزر تیار کرنے کی اجازت ہوگی۔
