The news is by your side.

Advertisement

کوئی پریذائیڈنگ افسر غائب نہیں ہوا: ڈی آر او

کراچی: این اے 249 میں ضمنی انتخاب کے سلسلے میں ڈسٹرکٹ ریٹرننگ افسر ندیم حیدر نے کہا ہے کہ کوئی پریذائیڈنگ افسر غائب نہیں ہوا، اس سلسلے میں تمام دعوے جھوٹے ہیں۔

تفصیلات کے مطابق ڈی آر او ندیم حیدر نے اے آر وائی نیوز سے گفتگو کرتے ہوئے پریذائیڈنگ افسر کے غائب ہونے کے دعوے کو مسترد کر دیا ہے، انھوں نے گزشتہ رات ایک بجے کے قریب اپنے بیان میں کہا کہ تمام پریذائیڈنگ افسران نتائج لے کر ڈی آر او آفس پہنچ چکے۔

خیال رہے کہ مسلم لیگ ن نے پریذائیڈنگ افسر کے غائب ہونے کا الزام لگایا تھا، دریں اثنا، پولنگ اسٹیشنز 260 اور 261 سے متعلق بھی ن لیگ کا دعویٰ غلط ثابت ہوا۔

ن لیگی امیدوار مفتاح اسماعیل نے دعویٰ کیا تھا کہ ان پولنگ اسٹیشنز کے نتائج جمع نہیں کرائے گئے، تاہم پریزائیڈنگ افسر محمد فیاض نے اے آر وائی نیوز سے گفتگو میں بتایا کہ ان پولنگ اسٹیشنز کا نتیجہ جمع کرا دیا ہے، اے آر وائی نیوز نے ان پولنگ اسٹیشنز کے فارم 45 بھی حاصل کیے۔

این اے 249: ضمنی الیکشن کا میدان پیپلز پارٹی نے مار لیا

واضح رہے کہ این اے 249 کے فارم 47 کے مطابق تمام 276 پولنگ اسٹیشنز کے غیر حتمی نتائج جاری کیے جا چکے ہیں، پیپلز پارٹی کے قادر خان مندوخیل 16156 ووٹ لے کر پہلے نمبر پر، جب کہ مسلم لیگ (ن) کے مفتاح اسماعیل 15473 ووٹ لے کر دوسرے نمبر پر ہیں۔

کالعدم تحریک لبیک پاکستان کے مفتی نذیر 11125 ووٹ لے کر تیسرے نمبر پر، پاک سرزمین پارٹی کے مصطفیٰ کمال 9227 ووٹ لے کر چوتھے نمبر پر، تحریک انصاف کے امجد آفریدی 8922 ووٹ لے کر پانچویں نمبر پر، جب کہ ایم کیوایم پاکستان کے حافظ مرسلین 7511 ووٹ لے کر چھٹے نمبر پر رہے۔

Comments

یہ بھی پڑھیں