کراچی : شہر قائد سے لاپتہ ہونے والی اسپیشل اولمپکس کی کھلاڑی بہاولپورمیں نانی کے گھر پہنچ گئی، ساجدہ بی بی31 مارچ کولاپتہ ہوئیں، جس کے بعد مقدمہ گلستان جوہر میں درج کرایا گیا تھا۔
تفصیلات کے مطابق کراچی کے علاقے گلستان جوہر سے لاپتہ ہونے والی اسپیشل اولمپکس کی کھلاڑی ساجدہ کے مبینہ اغوا کا ڈراپ سین ہوگیا ، ساجدہ اپنے گھر والوں کو بتائے بغیر بہاولپور ننھیال پہنچ گئی۔
پولیس نے بتایا کہ ساجدہ بی بی یکم مارچ کو گلستان جوہر میں گھر سے نکلی اور اس کے بعد لاپتہ ہو گئی، جس کے بعد اہل خانہ نے گلستان جوہر تھانے میں ساجدہ کے اغوا کا مقدمہ درج کرایا۔
مقدمے کے متن میں کہا گیا کہ ساجدہ گھروں میں کام کرتی تھی،4بجےگھرسےکام پرنکلی تھی، وہ بی بی قوت گویائی سےمحروم ہے اور گلشن اقبال بے نظیر بستی کی رہائشی تھی۔
اہل خانہ نے پولیس کو بتایا کہ ساجدہ کے گھر سے نکلنے کے بعد اس کا موبائل فون بند ہوگیا۔
جس کے بعد گلستان جوہر سے اسپیشل اولمپکس کی کھلاڑی ساجدہ کے مبینہ اغوا کے معاملے کی تحقیقات کے بعد پولیس نے بتایا کہ مغویہ ساجدہ اپنے گھر والوں کو بتائے بغیر بہاولپور اپنے نانا کے گھر پہنچ گئی ہے جبکہ ساجدہ اور اہلخانہ میں رابطہ ہوگیاہے۔
خیال رہے ساجدہ بی بی نے دو ہزار انیس میں پاکستان کے لیے اسپیشل اولمپکس میں گولڈ میڈل حاصل کیا تھا۔
