لاہور : عدالت نے دعازہرا کی عمر کے تعین کیلئے میڈیکل کی درخواست مسترد کر دی ، دعازہرا کے میڈیکل کیلئے کراچی کے تفتیشی افسر نے درخواست دائر کی تھی۔
تفصیلات کے مطابق لاہور کی ماڈل ٹاؤن کچہری میں دعا زہرا کے نکاح سے متعلق اہم پیش رفت سامنے آئی ، عدالت نے دعازہرا کی عمر کے تعین کیلئے میڈیکل کی درخواست مسترد کر دی۔
عدالت نے کہا کہ دعا زہرا کی مرضی کے بغیر میڈیکل کرانے کا حکم نہیں دیا جا سکتا، کسی بھی لڑکی کے میڈیکل کا حکم اس کی اجازت بغیر نہیں دیا جا سکتا ہے۔
دعا زہرہ کمرہ عدالت میں موجود نہیں ہے ، تفتیشی افسر نے درخواست مناسب جواز کے بغیر دائر کی ، اس لئے خارج کی جاتی ہے۔
خیال رہے دعا زہرا کے میڈیکل کیلئے کراچی کے تفتیشی افسر نے درخواست دائر کی تھی۔
یاد رہے آج صبح سندھ ہائی کورٹ نے دعا زہرا کو پیش نہ کرنے پر سخت برہمی کا اظہار کرتے ہوئے ایس ایس پی اے وی سی سی زبیر نذیر شیخ کو توہین عدالت کا نوٹس جاری کردیا تھا۔
عدالت کا کہنا تھا کہ بچی ویڈیو بنا رہی ہے، پریس کانفرنس کررہی ہے لیکن پولیس کونہیں مل رہی، عدالت نے آئی جی سندھ کو دعا زہرا کو پیش کرنے کا ٹاسک دے دیا۔
