The news is by your side.

دبئی ایئرپورٹ پر سہولیات کی آسان فراہمی، بچوں نے پاسپورٹ پر امیگریشن خود کرلی

دبئی: متحدہ عرب امارات کے شہر دبئی میں مسافروں کو سہولیات کی فراہمی کے آسان عمل کی بدولت دبئی ایئرپورٹ پر دو بچوں نے اپنے پاسپورٹ پر امیگریشن کی مہر خود لگائی۔

بین الاقوامی ویب سائٹ کے مطابق دبئی میں اقامہ اور غیر ملکیوں کے امور کے ادارے کے ڈائریکٹر جنرل محمد المری نے 2 برطانوی بچوں کو امیگریشن کاؤنٹر پر اپنے پاسپورٹ پر خود مہر لگانے کا موقع دیا۔

بچے یہ سن کر خوش ہوگئے کہ وہ امیگریشن کی مہر اپنے پاسپورٹ پر خود لگائیں گے۔

9 سالہ ازابیل اور 6 سالہ چارلس کے والد تھامس ولیمز نے بتایا کہ ہم لوگ برطانیہ میں چھٹیاں گزار کر دبئی پہنچے تھے جب امیگریشن کی لائن میں نمبر قریب آیا تو میرے دونوں بچوں کو تجسس ہوا کہ آخر کاؤنٹرز کے اندر موجود افسران کیا کرتے ہیں۔

اسی دوران اقامہ اور غیر ملکیوں کے امور کے ادارے کے ڈائریکٹر جنرل محمد المری تفتیشی دورے پر وہاں پہنچے، انہوں نے دونوں بچوں سے خوشگوار ماحول میں خیریت دریافت کی اور پھر وہ انہیں اپنے ہمراہ کاؤنٹر کے اندر لے گئے۔

ڈائریکٹر نے بچوں کو پاسپورٹ افسران کے طریقہ کار کے بارے میں بتایا، اتنا ہی نہیں بلکہ انہوں نے دونوں بچوں سے کہا کہ اپنے پاسپورٹ پر امیگریشن کی مہر وہ خود لگا سکتے ہیں۔

برطانوی شہری تھامس ولیمز کا کہنا ہے کہ دبئی میں یہ سب کچھ کوئی اچنبھے کی بات نہیں وہ 18 برس سے اپنی فیملی کے ساتھ یہاں مقیم ہیں، دونوں بچے دبئی میں پیدا ہوئے ہیں۔

Comments

یہ بھی پڑھیں