متحدہ عرب امارات کے نائب صدر شیخ محمد بن راشد المکتوم نے دبئی کے ‘فیوچر میوزیم’ کا افتتاح کردیا۔
اماراتی ریاست دبئی میں بنائے گئے ‘فیوچر آف دا میوزیم’ کے افتتاح کے موقع پر امارات کا قومی ترانہ بھی بجایا گیا، اس موقع پر شیخ راشد المکتوم نے کہا کہ فیوچر میوزیم انسان کے تخیل کا اظہار اور اماراتی عزم کا عملی اظہار ہے۔
انہوں نے اس حوالے سے ٹوئٹ بھی کیا، جس میں ان کا کہنا تھا کہ ‘فیوچر میوزیم امید کا پیغام، اظہار کا ذریعہ،عالمی سائنسی پلیٹ فارم اور ہم سب کے لیے بہترین مستقبل کی روشنی حاصل کرنے کا مکمل ادارہ ہے’۔
فیوچر میوزیم کے افتتاح کے موقع پر دبئی ایئرپورٹس اتھارٹی نے مسافروں کے پاسپورٹ پر ‘فیوچر میوزیم کی اسٹیمپ’ لگائی جب کہ برج العرب نے عربی رسم الخط کا خصوصی کیا کیا۔
#متحف_المستقبل يجسد ريادة #الإمارات العالمية في صناعة المستقبل.#أجمل_مبنى_على_وجه_الأرض #وام pic.twitter.com/Ktc7ePZtB7
— وكالة أنباء الإمارات (@wamnews) February 22, 2022
واضح رہے کہ دبئی کے شیخ زاید روڈ کے ساتھ نمایاں نظر آنے والا بیضوی نما میوزیم آف دی فیوچر طرز تعمیر کا ایک شاہکار ہے اور دنیا کا ایک اور لینڈ مارک بن گیا ہے۔
نیشنل جیوگرافک نے دبئی کے’ میوزیم آف دی فیوچر‘ کو دنیا کے 14 خوب صورت ترین عجائب گھروں میں شامل کیا تھا۔
رپورٹ کے مطابق 30 ہزار مربع میٹر پر محیط فیوچر میوزیم صحت، تعلیم، توانائی، ٹرانسپورٹ اور اسمارٹ سٹیز سمیت متعدد شعبوں میں تخلیقی لیباریٹریوں پر مشتمل ہے۔
