دبئی : ایئرپورٹ سیکیورٹی فورس نے مصری شخص کی شکایت پر کارروائی کرتے ہوئے ہوائی اڈے سے مسافروں کا سامان چوری کرنے کے الزام میں تین ایشیائی شہریوں کو گرفتار کرلیا۔
تفصیلات کے مطابق متحدہ عرب امارات کی ریاست دبئی کے عالمی ہوائی اڈے پر تعینات ایئرپورٹ سیکیورٹی فورس اہلکاروں نے کارروائی کرتے ہوئے ایئرپورٹ پر مسافروں کا سامان چورانے والے ملزمان کو گرفتار کرلیا ہے۔
غیر ملکی خبر رساں ادارے کا کہنا تھا کہ مصر سے تعلق رکھنے والے شخص نے دبئی پولیس کو شکایت درج کروائی تھی کہ اس کے سامان سے مہنگا ترین موبائل آئی فون چور ہوگیا ہے۔
عرب میڈیا کے مطابق مصری شخص کا کہنا تھا کہ جب میں نے اپنا سامان دیکھا تو حیران رہ گیا کہ بیگ کھلا ہوا تھا، میں نے کھلا بیگ دیکھ کر فوراً اپنے سامان کی تلاشی لی تو پتہ چلا کہ میرا آئی فون چوری ہوچکا ہے۔
دبئی پولیس کا کہنا ہے کہ مصری شخص نے آئی کلاؤڈ سافٹ فیئر کی مدد سے اپنے موبائل کو ٹریک کیا تو معلوم ہوا کہ موبائل دبئی میں ہے، جس کے بعد متاثرہ شخص نے پولییس کو اطلاع دی اور پولیس نے ملزمان کو گرفتار کیا۔
دبئی پولیس کے ترجمان نے میڈیا کو بتایا کہ تین ملزمان ہیں جو دبئی کے عالمی ہوائی اڈے سے سامان چوری کرنے میں ملوث ہیں۔
پولیس کا کہنا تھا کہ تینوں ملزمان کا تعلق ایشیائی ممالک سے ہے اور ان کی عمریں19 برس سے 27 برس ہیں، جو ایئرپورٹ پر ملازمت کرتے ہیں اور جہاز کی صفائی کرنے کا کام کرتے ہیں۔
غیر ملکی خبر رساں ادارے کا کہنا تھا کہ تینوں ملزمان نے پولیس تفیش کے دوران ایئرپورٹ پر مسافروں کے بیگوں سے سامان چوری کرنے کا اعتراف کیا، جس کے بعد پولیس نے مذکورہ ملزمان کو عدالت کے حکم پر جیل منتقل کردیا۔
