دبئی: محکمہ ٹریفک کا کہنا ہے کہ دبئی میں ’مثالی‘ ڈرائیوروں کی تعداد میں اضافہ ہو رہا ہے۔
الامارات الیوم کے مطابق متحدہ عرب امارات میں دبئی محکمہ ٹریفک کے قائم مقام ڈائریکٹر بریگیڈیئر جمعہ سویدان نے کہا ہے کہ معاشرے میں ٹریفک آگہی بڑھ رہی ہے، اور مثالی ڈرائیوروں کے گراف میں اضافہ ہونے لگا ہے۔
انھوں نے کہا 2021 کے دوران 12 ہزار 351 مقامی شہریوں نے محفوظ ڈرائیونگ کی، ان میں سے کسی پر کوئی ٹریفک خلاف ورزی ریکارڈ نہیں کی گئی، اور پابندی کا تناسب 161 فی صد رہا۔
بریگیڈیئر جمعہ سویدان کے مطابق 18 سے 30 برس تک کے مثالی ڈرائیورز کی تعداد 25 ہزار رہی۔
انھوں نے بتایا ’اس سال 2 لاکھ 44 ہزار 446 ڈرائیوروں نے ٹریفک نظام کی پابندی کی جب کہ 2021 کے دوران ان کی تعداد ایک لاکھ 75 ہزار 896 تھی، اور 2020 میں ایک لاکھ 37 ہزار 269 اور 2019 میں 87 ہزار 562 مثالی ڈرائیور ریکارڈ پر آئے تھے۔‘
گزشتہ سال ٹریفک نظام کی پابندی کرنے والے مقامی ڈرائیوروں کی تعداد میں نمایاں اضافہ دیکھنے میں آیا۔ بریگیڈیئر جمعہ سویدان کا کہنا تھا کہ ماضی میں ٹریفک نظام کی بیش تر خلاف ورزیاں نوجوان کر رہے تھے، اب ان کے یہاں خلاف ورزیوں کی شرح کم ہو گئی ہے۔
