دبئی: متحدہ عرب امارات میں ایک بے روزگار ایشیائی شہری پڑوس میں رہائش پذیر جوڑے کی ویڈیو بناتے ہوئے پکڑا گیا۔
تفصیلات کے مطابق دبئی میں کراما اپارٹمنٹ میں ایک شخص خفیہ طریقے سے پڑوس میں رہائش پذیر ایک جوڑے کی ویڈیو بناتے ہوئے پکڑا گیا، عدالت نے اسے 2 ماہ قید کی سزا کے ساتھ ساتھ قید کے اختتام پر ملک بدر کرنے کا حکم بھی دے دیا۔
متاثرہ شخص نے دبئی کی فوجداری عدالت کو بتایا کہ 26 سالہ ایشیائی شہری نے رات کو ان کی پرائیویسی کی خلاف ورزی کرتے ہوئے موبائل فون سے ویڈیو بنانے کی کوشش کی، جس پر میں نے اسے پکڑ لیا۔
دی نیشنل نیوز کے مطابق متاثرہ شہری کا کہنا تھا کہ انھوں نے پولیس کو کال کرنے سے قبل ویڈیو بنانے والے شخص کو پکڑا، وہ فلیٹ کے پارٹیشن کی جپسم کی دیوار میں موجود سوراخ سے موبائل کے ذریعے ویڈیو بنا رہا تھا، اہل کار آدھی رات کے بعد اپارٹمنٹ پہنچے اور اس شخص کو گرفتار کر لیا گیا جس نے 25 سیکنڈ کی ویڈیو ریکارڈنگ کا اعتراف کیا۔
واضح رہے کہ متحدہ عرب امارات میں اپارٹمنٹس کا اشتراک غیر قانونی ہے، لیکن جوڑے نے کہا کہ وہ مالی مشکلات کی وجہ سے علیحدہ فلیٹ کرائے پر نہیں لے سکتے۔ اس صورت حال کے پیش نظر دبئی میں متعدد غیر ملکی کوئی ایک فلیٹ کرائے پر حاصل کر کے اس کے کمرے شیئر کر لیتے ہیں۔ پولیس نے یہ نہیں بتایا کہ آیا فلیٹ کو ذیلی لیز پر دینے کے لیے مالک مکان یا کرایہ داروں کے خلاف کوئی کارروائی کی گئی یا نہیں۔
ایشیائی شہری نے اقبال جرم کرتے ہوئے کہا کہ جو کچھ ہوا غلط ہوا، عدالت سے رحم کی درخواست کرتا ہوں، میرا مقصد پڑوسی جوڑے کی پرائیویسی میں خلل ڈالنا نہیں تھا۔ تاہم عدالت نے اسے دو ماہ کے لیے جیل بھیج دیا۔
