دبئی: متحدہ عرب امارات کی ریاست دبئی میں پولیس نے منشیات فروش گینگ کو گرفتار کرلیا جس کی ویڈیو بھی جاری کردی گئی ہے۔
غیرملکی خبررساں ادارے کی رپورٹ کے مطابق دبئی پولیس نے منشیات کی اسمگلنگ ناکام بناتے ہوئے گینگ کو گرفتار کرلیا، ویڈیو میں دیکھا جاسکتا ہے کہ دبئی پولیس نے کس طرح ملزمان کو حراست میں لیا۔
دبئی پولیس کے کمانڈر انچیف لیفٹیننٹ جنرل عبداللہ خلیفہ المری نے کہا کہ یہ گروہ منشیات کے فروغ کے لیے موجودہ کوویڈ 19 کے احتیاطی اقدامات سے فائدہ اٹھانے کی کوشش کررہا تھا۔
انہوں نے کہا کہ میں نے محکمہ انسداد منشیات کے ذریعہ کی جانے والی بھرپور کوششوں کی تعریف کی اور اس بات پر زور دیا کہ آپریشن انتہائی نفیس منصوبہ بندی اور اعلیٰ پیشہ ورانہ مہارت کے ساتھ کیا گیا۔
لیفٹیننٹ جنرل المری کے مطابق اس کارروائی سے ہمارے افسران نے بڑی صلاحیتوں کو اجاگر کیا جب وہ اس گروہ کی سرگرمیوں کی نگرانی کرنے میں کامیاب ہوئے اور جب متعلقہ محکمہ کو چھاپے تک گروہ کی سرگرمی کے بارے میں اطلاع موصول ہوئی۔
#Video | Operation “Cleansing”: Dubai Police seizes 59Kgs of Heroin and Crystal
Details: https://t.co/T5WobJJAsc pic.twitter.com/j9JkUJaCu3— Dubai Policeشرطة دبي (@DubaiPoliceHQ) April 16, 2020
دبئی پولیس کے مجرمانہ تفتیشی امور کے چیف اسسٹنٹ کمشنر انچیف میجر جنرل خلیل ابراہیم نے انکشاف کیا کہ محکمہ انسداد منشیات کو اس گروہ کے ممبروں کے بارے میں اطلاع ملی جس نے نوجوانوں میں منشیات کو فروغ دینے کی کوشش کی تھی۔
میجر جنرل المںصوری کے مطابق انسداد منشیات ٹیم نے بروقت کامیابی کے ساتھ مجرموں کو گرفتار کیا اور 59 کلو منشیات برآمد کی جن میں 26 کلو ہیروئن اور 33 کلو کرسٹل میتھ بھی شامل ہے۔
محکمہ انسداد منشیات کے ڈائریکٹر بریگیڈیئر عید محمد تھانوی نے بتایا ، "گروہ کے رہنما سمیت دو ملزمان کو رنگے ہاتھوں گرفتار کیا گیا جب وہ منشیات لے جارہے تھے۔ دیگر دو مشتبہ افراد کو دبئی میں ان کی رہائش گاہ کے سامنے گرفتار کیا گیا۔”
