دبئی : دبئی کے ولی عہد اور دبئی ایگزیکٹو کونسل کے چیئرمین شیخ حمدان بن محمد بن راشد المکتوم نے دبئی میں کاروں کے ذریعے مسافر ٹرانسپورٹ کی ریگولیشن سے متعلق ایگزیکٹو کونسل قرارداد نمبر 6 مجریہ 2016 میں ترمیم کے تحت ایگزیکٹو کونسل کی قرارداد نمبر 20 مجریہ 2021 کو جاری کردیا ہے۔
یہ اقدام دبئی کے اسٹریٹجک شعبوں کے ریگولیٹری فریم ورک کے ازسر نوجائزہ کے بعد کیا گیا ہے تاکہ شہر میں معیار زندگی کو مزید بہتر بناتے ہوئے یہاں عالمی معیار کی خدمات فراہم کی جاسکیں۔
اس نئی قرار داد کا نفاذ تمام دبئی میں ہوگا جن میں خصوصی ترقیاتی زونز اور فری زونز شامل ہیں، نئی قرارداد کے ذریعے سال 2016کی قرارداد نمبر 6 کی شقوں ایک، دو، پانچ اور سات میں ترامیم کی گئی ہیں۔
کلاز ون میں ترمیم کا سابقہ قرارداد میں درج تعریف اور شرائط سے تعلق ہے، کلاز ٹو میں کی جانے والی ترمیم میں آر ٹی اے کے ذیلی ادارہ پبلک ٹرانسپورٹ ایجنسی کے کردار کو وضع کیا گیا ہے جس میں لائسنس اور پرمٹس کا اجراء شامل ہے۔
ایجنسی کو پرعزم افراد کیلئے ٹیکسی استعمال کی ہدایات بنانے کا اختیار دیا گیا ہے تاکہ ٹیکسی سروس والی کمپنیاں پرمٹس کی شرائط کو مکمل انجام دیں۔
شق فائیو میں تبدیلی کرکے ایسی خلاف ورزیوں کا تعین کیا گیا ہے جن پر جرمانے عائد ہوسکتے ہیں ۔ شق 7 میں ترمیم کا تعلق عائد جرمانوں سے ہے۔
اس کے مطابق خلاف ورزی کے مرتکب کارپوریٹ والوں کو 50 ہزار درہم اور انفرادی لوگوں کو 30 ہزار درہم جرمانہ ہوسکے گا یہ نئی قرارداد اپنے اجراء کے دن سے نافذالعمل ہے اور اسے سرکاری گزٹ میں بھی شائع کیا جائے گا۔
