ابو ظہبی: متحدہ عرب امارات کے شہر دبئی میں دنیا بھر سے آنے والوں کی تعداد صرف اکتوبر کے مہینے میں 10 لاکھ سے تجاوز کر گئی۔
اماراتی میڈیا رپورٹ کے مطابق دبئی کے محکمہ اقتصادیات و سیاحت کے اعداد و شمار میں بتایا گیا ہے کہ جنوری 2021 سے لے کر اکتوبر 2021 تک 48 لاکھ 82 ہزار مسافروں نے دبئی کا دورہ کیا ہے۔
محکمہ اقتصادیات و شماریات دبئی کے مطابق کرونا وائرس کے پھیلاؤ سے محفوظ رہنے کے لیے لگائے گئے لاک ڈاؤن کے باوجود مہمان نوازی کی صنعت میں یہ اعداد و شمار مستحکم اور بہتر پوزیشن کی عکاسی کرتے ہیں۔
محکمہ سیاحت کی جانب سے گزشتہ سال کی اسی مدت کے لیے کوئی موازنہ نہیں کیا گیا۔
ایک اور رپورٹ کے مطابق امارات کے مہمان نوازی کے شعبہ کی جانب سے جنوری سے اکتوبر کے عرصے میں دبئی میں موجود ہوٹلوں کے کمروں کی بکنگ کا حساب لگایا جائے تو مجموعی طور پر 94 لاکھ کمرے بک کیے گئے۔
سنہ 2019 میں اسی عرصے کے دوران 70 لاکھ کمروں کی بکنگ کے اعداد و شمار سامنے آئے تھے۔
