چیمپئنزٹرافی میں پاکستان اور بھارت کے درمیان دبئی میں ہونے والے میچ میں جیت کے لیے کتنا ٹوٹل کافی ہوگا، سابق کرکٹر نے بتادیا۔
سرکاری چینل پر پاکستان کرکٹ ٹیم کے سابق کپتان محمد حفیظ نے دبئی میں بننے والے ٹوٹل اسکور اور کس طرح وہاں رنز بنانے ہیں اس پر اظہار خیال کیا، ان کا کہنا تھا کہ آپ کو وہاں پر ہوشیاری سے کرکٹ کھیلنا پڑتی ہے، ٹیکنیکلی آپ کو وہاں تھوڑا سا ٹھہرنا پڑتا ہے، نیا بال اچھا آتا ہے۔
محمد حفیظ نے کہا کہ جیسے ہی نئے بال کی سیم اندر جاتی ہے 15 اوور کے بعد تو بال بلے پر تھوڑا سلو آتا ہے، وہاں پر آپ کی فٹنس اور دوڑنے کی صلاحیت کافی اہم رول ادا کرتی ہے۔
انھوں نے کہا کہ دبئی کا گراؤنڈ لگتا چھوٹا ہے مگر بڑا گراؤنڈ ہے، یہاں پر آپ کو ایک اچھا ٹوٹل بنانا ہوگا، آپ کو یہاں پر اتنی باؤنڈریز نہیں ملیں گی جتنی دنیا کے کسی اور گراؤنڈ میں ملتی ہیں۔
سابق کپتان نے کہا کہ اگر آپ انڈیا اور بھارت میں کھیل رہے ہیں تو وہاں باؤنڈری پرسنٹیج زیادہ ہوگی مگر دبئی کے گراؤنڈ میں باؤنڈری کم لگتی ہے یہاں رننگ پرسنٹیج زیادہ ہوتی ہے تو مجھے لگتا ہے کہ یہاں 260 رنز ایک اچھا ٹوٹل ہونگے۔
انھوں نے کہا کہ اگر آپ وہاں اسکور کو ٹچ کردیتے ہیں اور آپ کے پاس دو سے تین کوالٹی اسپن آپشن موجود ہیں تو آپ مخالف کو چیلنج کرتے ہیں۔
محمد حفیظ نے کہا کہ دبئی کے گراؤںڈ میں کوئی بھی ٹیم اگر 260 رنز بنائے گی تو میرے خیال میں وہ دوسری ٹیم کو چیلنج کرسکتی ہے۔
