دبئی میں بچوں کے لیے تعلیمی اور تفریحی پروگرام ونٹر اسپیس ایکسپلورر کیمپ کا انعقاد کیا جارہا ہے جو مختلف سرگرمیوں پر مشتمل ہے۔
تفصیلات کے مطابق محمد بن راشد اسپیس سینٹر (ایم بی آر ایس سی) نے "ونٹر اسپیس ایکسپلورر کیمپ 2024” کے لیے رجسٹریشن کا اعلان کیا ہے جو 23 سے 26 دسمبر تک سینٹر کے ہیڈ کوارٹر میں منعقد ہوگا۔
رپورٹ کے مطابق ونٹر اسپیس ایکسپلورر کیمپ 2024 7 سے 10 سال کے بچوں کے لیے ایک تعلیمی اور تفریحی پروگرام ہے۔
یہ کیمپ مختلف سرگرمیوں پر مشتمل ہے جو بچوں میں خلا کے بارے میں تجسس اور دلچسپی کو پروان چڑھاتی ہیں۔ اس سال یہ کیمپ ایک ایڈیشن کی صورت میں منعقد ہوگا جس میں لڑکے اور لڑکیاں دونوں شرکت کرسکتے ہیں۔ کیمپ کی سرگرمیوں میں تعلیمی اور عملی ورکشاپس، مقابلے اور تفریح شامل ہیں۔
اس موقع پر شرکاء کو خلا میں روبوٹکس کے کردار کے بارے میں جاننے کا موقع ملے گا۔ ایم بی آر ایس سی کی خلائی کاوشوں کا جائزہ لیا جائے گا۔
تھری ڈی خلائی تخلیقات کا ڈیزائن، سائنسی تجربات اور اماراتی خلا بازوں سے ملاقات کی جائے گی تاکہ وہ اپنے مشن اور تربیتی تجربات کو شیئر کر سکیں۔
اس حوالے سے ڈائریکٹر اسٹریٹجک کمیونیکیشن کا کہنا ہے کہ "ونٹر اسپیس ایکسپلورر کیمپ کے ذریعے طلباء اپنی چھٹیوں میں تعلیمی اور تفریحی سرگرمیوں کے ذریعے اپنی سائنسی اور عملی صلاحیتوں کو بڑھا سکتے ہیں۔
مذکورہ کیمپ متحدہ عرب امارات کے خلائی شعبے میں ترقی اور کامیابیوں کو تقویت دینے کے لیے مستقبل کے سائنس دانوں، انجینئرز اور خلا بازوں کی پرورش کے ایم بی آر ایس سی کے ہدف کے مطابق ہے۔
دلچسپی رکھنے والے افراد کیمپ میں شرکت کے لیے درج ذیل لنک پر رجسٹر کرسکتے ہیں:
Winter Space Camp2024 – MBRSC
