شاہ رخ کی فلم ڈنکی میں اداکاری کے جوہر دکھانے والے ورون کلکرنی اسپتال میں زیرعلاج ہیں اور ان کے پاس بل ادا کرنے کے بھی پیسے نہیں ہیں۔
ڈنکی کے اداکار ورون کلکرنی کو اسپتال کے بل کی ادائیگی کےلیے مالی امداد کی ضرورت پیش آگئی ہے اور وہ مدد کے منتظر ہیں، گردے کی بیماری میں مبتلا ورون اسپتال میں زیرعلاج ہیں جہاں انہیں ہفتے میں کم از کم 2 بار ڈائیلاسز سے گزرنا پڑتا ہے۔
بھارتی میڈیا پر آنے والی خبروں کے مطابق روشن شیٹی جو اداکار کے دوست ہیں انھوں نے سوشل میڈیا پر ورون کلکرنی کی تازہ تصویر شیئر کرتے ہوئے انھیں درپیش مالی مسائل کا تذکرہ کیا ہے۔
روشن شیٹی کا اپنی پوسٹ میں کہنا تھا کہ ورون کلکرنی نے اسپتال کے بل ادا کرنے ہیں، انھیں پیسوں کی ضروت ہے ان کی مالی مدد کی جائے۔
ورون بہت خود دار انسان ہے، جس نے زندگی کی تمام مشکلات کے باوجود اپنے تھیٹر کے شوق کو جاری رکھا، ان کی زندگی اب مالی تنگ دستی سے نبرد آزما ہے۔
انھوں نے بتایا کہ تھیٹر کے میرے ساتھی فنکار ورون کلکرنی اس وقت گردے کی بیماری سے لڑرہے ہیں، وہ اسپتال میں زیر علاج ہیں، اخراجات جمع کردہ فنڈ سے تجاوز کرگئے ہیں، ڈائیلاسز کے علاوہ اسپتال کے ایمرجنسی وزٹ کے باعث اخراجات میں اضافہ ہوا۔
ورون کے دوست روشن نے ان کی زندگی کے حوالے سے بتاتے ہوئے کہا کہ اس شاندرار فنکار نے چھوٹی عمر میں والدین کو کھودیا تھا، وہ ایک مہربان اور بے لوث انسان ہیں۔
