The news is by your side.

Advertisement

حج کے دوران مسلکی، مذہبی اور سیاسی نعرے بازی سے گریز کریں، سعودی علماء

ریاض : سعودی عرب کی سینئر علماء کونسل نے جاری بیان میں کہا ہے کہ حجاج کرام کو حج کی عبادت کے موقعے سے فایدہ اٹھا کرخود کو عبادت اور اطاعت الہیٰ کے لیے وقف کردینا چاہیے۔

تفصیلات کے مطابق سعودی عرب کی سینئر علماءکونسل نے کابینہ کی طرف سے جاری کردہ اس بیان کی تائید کی ہے جس میں عازمین حج پر زور دیا گیا ہے کہ وہ فریضہ حج کے دوران اپنی توجہ مناسک حج کر پرمرکوز رکھیں اور ہرقسم کی مسلکی، مذہبی اور سیاسی نعرے بازی سے گریز کریں۔

سعودی عرب کی علماءکونسل کے جنرل سیکرٹریٹ سے جاری ایک بیان میں کہا گیا کہ حج بیت اللہ کے لیے آنےوالے فرزندان توحید کا اصل کام مناسک حج کی ادائیگی ہے۔

ان کا کہنا تھا کہ حج کے ایمانی مقاصد کا حصول ہی ہرحاجی کی پہلی ترجیح ہے، حجاج کرام کو حج کی عبادت کے موقعے سے فائدہ اٹھا کرخود کو عبادت اور اطاعت الہیٰ کے لیے وقف کردینا چاہیے۔

سعودی عرب کے سینئر علماء کونسل کا کہنا تھا کہ حجاج کرام کے لیے کسی قسم کے سیاسی اور فرقہ وارنہ نعرے بازی یا ایسی کسی سرگرمی میں حصہ لینے کا کوئی جواز نہیں۔

بیان میں مزید کہا گیا کہ حج کے دوران حجاج کرام کا سب سے بڑا مقصد عبادت، قرب الٰہی، معصیت سے اجتناب اور اطاعت خدا وندی ہے۔ حج پوری مسلم امہ کی وحدت کی علامت ہے اور حج کے شعائر کی ان کی روح کے مطابق ادائیگی ہرحاجی کی دینی ذمہ داری ہے۔

یاد رہے کہ اس سے قبل سعودی عرب کابینہ نے بھی عازمین حج پر خود کو سیاسی نعرے بازے سے دور رکھنے پر زور دیتے ہوئے اپنی توجہ شعائر حج بیت اللہ پر مرکوز رکھنے کی اپیل کی تھی۔

Comments

comments

یہ بھی پڑھیں