پاکستان کرکٹ بورڈ کی جانب سے لاہور، کراچی اور راولپنڈی کے کرکٹ اسٹیڈیمز کو اپ گریڈ کرنے کا فیصلہ کیا گیا ہے۔
تفصیلات کے مطابق پی ایس ایل کا نواں ایڈیشن کامیابی سے جاری ہے، اسی دوران چیئرمین پی سی بی محسن نقوی کی زیرِصدارت اجلاس ہوا جس میں لاہور، کراچی اور راولپنڈی کے کرکٹ اسٹیڈیم اپ گریڈ کرنے کا فیصلہ سامنے آیا ہے۔
چیئرمین پاکستان کرکٹ بورڈ محسن نقوی نے اسٹیڈیم کی اپ گریڈیشن کا پلان طلب کرلیا ہے۔ سربراہ پی سی بی نے 3 روز میں قذافی اسٹیڈیم کا حتمی ڈیزائن طلب کرلیا ہے۔
محسن نقوی کا کہنا تھا کہ چیمپئنز ٹرافی سے قبل تینوں اسٹیڈیم کو اپ گریڈ کیا جائے گا۔ دوسرے مرحلے میں کراچی اور راولپنڈی اسٹیڈیم کا کام شروع ہوگا،
پاکستان کرکٹ بورڈ کے چیئرمین کا اجلاس کے دوران کہنا تھا کہ اسٹیڈیم میں سہولتوں میں اضافہ کیا جائے گا جبکہ نشستیں بھی بڑھائیں گے۔
انھوں نے کہا کہ اپ گریڈیشن کے کام کو معیار اور رفتار کے ساتھ مکمل کرائیں گے۔ اس موقع پر نیسپاک حکام نے اسٹیڈیم کے اپ گریڈیشن پر بریفنگ بھی دی۔
