ایمسٹرڈیم : یورپی ملک ہالینڈ میں اشیا کو ٹھنڈا رکھنے والے ایک کنٹینر میں چھپے پچیس مہاجرین کو پکڑ لیا گیا ہے۔
تفصیلات کے مطابق روٹرڈیم کی پولیس نے بتایا کہ یہ مہاجرین ڈنمارک کے ایک جہاز کے کنٹینر میں چھپے ہوئے تھے، اس کنٹینر کو لے جانے والے ڈرائیور کو گرفتار کر لیا گیا ہے لیکن یہ ابھی واضح نہیں ہے کہ آیا اسے ان مہاجرین کا علم تھا۔
پولیس کی جانب سے فی الحال پکڑے جانے والے تارکین وطن کی شناخت بھی ظاہر نہیں کی گئی، ماضی میں بھی تارکین وطن کو کنٹینروں کے ذریعے یورپ اسمگلکر نے کے ایسے متعدد واقعات پیش آچکے ہیں۔
غیر ملکی خبر رساں ادارے کا کہنا تھا کہ کنٹینر سے برآمد ہونے والے مہاجرین میں زیادہ تعداد مردوں کی ہے۔
میڈیا رپورٹس کے مطابق دو افراد کنٹینر میں بے ہوش ہوگئے تھےجنہیں اسپتال منتقل کردیا گیا تھا جبکہ باقی 23 افراد کا بھی میڈیکل چیک اپ کیا جارہا ہے۔
ڈچ پولیس نے ٹرک ڈرائیور کوانسانی اسمگلنگ کے جرم میں گرفتار کرکے واقعے کی تحقیقات شروع کردی ہیں جبکہ ٹرک کو بھی قبضے لےلیا ہے۔
واضح رہے کہ گزشتہ ماہ برطانیہ کی کاؤنٹی ایسکس کے علاقے واٹر گلیڈ انڈسٹریل پارک میں ایک کنٹینر سے 39 لاشیں برآمد ہوئی تھیں جنہیں پولیس نے ایمبولینس کے ذریعے اسپتال منتقل کردیا تھا۔
مزید پڑھیں: لندن میں کنٹینر سے ملنے والی 39 لاشوں کی شناخت کرلی گئی، ڈرائیور گرفتار
لندن، ٹرک میں مرنے والی ویتنامی لڑکی کا آخری خط سامنے آگیا
ایسکس پولیس کا کہنا تھا کہ ٹرک سے برآمد ہونے والی 38 لاشیں بالغ افراد کی جبکہ ایک نابالغ شخص کی لاش ہے۔
غیر ملکی میڈیا کے مطابق مذکورہ افراد غیر قانونی طور پر برطانیہ میں داخل ہونا چاہتے تھے۔
