اسلام آباد: وفاقی دارالحکومت اسلام آباد سمیت ملک کے مختلف شہروں میں زلزلے کے شدید جھٹکے محسوس کیے گئے، ریکٹر اسکیل پر زلزلے کی شدت 6.0 محسوس کی گئی۔
تفصیلات کے مطابق وفاقی دارالحکومت اسلام آباد اور صوبہ خیبر پختونخواہ و پنجاب کے مختلف شہروں میں ایک بار پھر زلزلے کے جھٹکے محسوس کیے گئے۔
زلزلے کے جھٹکے اسلام آباد اور راولپنڈی کے ساتھ ساتھ صوبہ خیبر پختونخواہ کے مختلف شہروں پشاور، سوات، بٹگرام، دیر بالا، صوابی، مالا کنڈ، کوہاٹ، لوئر دیر، بونیر، مہمند، مردان، چارسدہ، بنوں اور شانگلہ میں محسوس کیے گئے۔
پنجاب کے جن شہروں میں زلزلہ محسوس ہوا ان میں مری، ظفر وال، شکر گڑھ، جلالپور بھٹیاں، سرائے عالمگیر، سرگودھا اور فیصل آباد شامل ہیں۔
زلزلے سے شہری خوفزدہ ہو کر کلمہ طیبہ کا ورد کرتے ہوئے گھروں سے باہر نکل آئے۔
زلزلہ پیما مرکز کا کہنا ہے کہ ریکٹر اسکیل پر زلزلے کی شدت 6.0 ریکارڈ کی گئی، زلزلے کا مرکز افغانستان تاجکستان بارڈر تھا اور زلزلے کی گہرائی 223 کلومیٹر زیر زمین تھی۔
پختونخواہ کی ڈیزاسٹر مینجمنٹ اتھارٹی (پی ڈی ایم اے) کا کہنا ہے کہ تاحال کنٹرول روم کو کسی قسم کے نقصانات کی اطلاعات موصول نہیں ہوئیں، عوام ناخوشگوار واقعے کی اطلاع پی ڈی ایم اے کنٹرول روم کو 1700 پر دیں۔
خیال رہے کہ اس سے قبل مارچ میں دارالحکومت اسلام آباد سمیت پنجاب، خیبر پختونخوا اور بلوچستان کے مختلف شہروں میں زلزلے کے شدید جھٹکے محسوس کیے گئے تھے۔
22 مارچ کی شب آنے والے زلزلے کی شدت 6.8 ریکارڈ کی گئی تھی جس کا مرکز افغانستان تھا۔
زلزلے سے پختونخوا میں 9 افراد جاں بحق اور 44 زخمی بھی ہوئے تھے جبکہ 19 گھروں کو جزوی نقصان پہنچا تھا۔
