ترکیہ کے تباہ کن زلزلے میں جاں بحق ہونے والوں کی تدفین ایک اجتماعی قبرستان میں کی جارہی ہے، ہلاک شدگان کی گمنام قبروں کو تصاویر اور نمبروں سے شناخت کیا جارہا ہے۔
ترکیہ میں زلزلے کی تباہ کن آفت کا شکار ہونے والے علاقے ھطائی میں بڑے پیمانے ہونے والی ہلاکتوں کے بعد جاں بحق افراد کیلئے اجتماعی قبرستان بنایا گیا ہے جس میں قبروں پر ان میں مدفون افراد کی لاشوں کے ناموں کے بجائے نمبر اور تصاویر لگائی گئی ہیں، تاہم ان قبروں پر لاشوں کے نام اور دیگر کوئی شناخت موجود نہیں۔
العربیہ ڈاٹ کام کی رپورٹ کے مطابق’ہاطائی‘ کے قبرستان کی بنائی گئی ویڈیو میں بتایا گیا ہے کہ قبرستان میں زلزلے سے جاں بحق ہونے والے سیکڑوں افراد کو دفن کیا گیا ہے۔
موفد العربية عمار الهندي يرصد مقبرة جماعية ضخمة لضحايا الزلزال في هطاي
#العربية#زلزال_سوريا_تركيا pic.twitter.com/GTSEHHrYOA— العربية (@AlArabiya) February 12, 2023
نامہ نگار کی طرف سے بنائی گئی ویڈیو فوٹیج میں سینکڑوں قبریں دکھائی دے رہی ہیں، جن پر ناموں کے بغیر صرف نمبر موجود ہیں کیونکہ بہت سے جاں بحق افراد کی لاشوں کی شناخت نہیں ہوسکی۔
رپورٹ کے مطابق یہ اقدام وبائی امراض کے پھیلنے کے خوف سے لاشوں کو اس طرح دفنانے کے لیے کیا گیا ہے۔
اسپتالوں اور کھیل کے میدانوں اور دیگر عوامی مقامات پر بھی ہزاروں لاشوں کے ڈھیر لگ جاتے ہیں مگر متاثرہ علاقوں میں فوت ہونے والوں کے لواحقین نہیں پہنچ پاتے۔
