کوئٹہ : صوبہ بلوچستان کے دارالحکومت کوئٹہ، ژوب اور گردونواح میں زلزلے کے جھٹکے محسوس کیے گئے، شہری خوف وہراس کا شکار ہو کر گھروں سے نکل آئے۔
تفصیلات کے مطابق صوبہ بلوچستان کے دارالحکومت کوئٹہ، ژوب اوراس کے گردونواح میں زلزلے کے جھٹکے محسوس کیے گئے، زلزلہ پیما مرکز کے مطابق ریکٹر اسکیل پرزلزلے کی شدت 4.5 ریکارڈ کی گئی۔
زلزلے کے جھٹکے مختصر دورانیے کے تھے۔ جھٹکے شروع ہوتے ہی شہری کلمہ طیبہ کا ورد کرتے ہوئے عمارتوں سے باہر آگئے۔
زلزلہ پیما مرکز کا کہنا ہے کہ کوئٹہ، ژوب اور گردونواح میں آنے والے 4.5 شدت کے زلزلے کا مرکز ژوب سے 66 کلومیٹر دور شمال میں تھا جس کی زیر زمین گہرائی 76 کلو میٹرریکارڈ کی گئی۔
سبی اور گردو نواح میں زلزلے کے جھٹکے
یاد رہے کہ 3 روز قبل صوبہ بلوچستان کے ضلع سبی اوراس کے گردونواح میں زلزلے کے جھٹکے محسوس کیے گئے تھے، زلزلہ پیما مرکز کے مطابق ریکٹراسکیل پرزلزلے کی شدت 3 ریکارڈ کی گئی تھی۔
زلزلہ پیما مرکز کا کہنا تھا کہ ضلع سبی میں محسوس کیے جانے والے زلزلے کا مرکزسبی سے 90 کلومیٹرجنوب مغرب میں تھا، زلزلے کی گہرائی 20 کلومیٹرریکارڈ کی گئی تھی۔
