اسلام آباد: پنجاب، خیبر پختون خوا اور آزاد کشمیر کے مختلف علاقوں میں زلزلہ آ گیا۔
اے آر وائی نیوز کے مطابق پنجاب، خیبر پختون خوا اور میر پور آزاد کشمیر کے مختلف علاقوں میں زلزلے کے شدید جھٹکے محسوس کیے گئے۔
زلزلے کے جھٹکے پنجاب میں وفاقی دارالحکومت اسلام آباد، لاہور، راولپنڈی، مری، فیصل آباد، ملتان، سرگودھا، گوجرانوالہ، ٹوبہ ٹیک سنگھ، جھنگ، ننکانہ صاحب، رینالہ خورد، عارف والا، پھول نگر میں محسوس کیے گئے۔
پنڈدادن خان، قائد آباد، تاندلیانوالہ، سمندری، جڑانوالہ، شور کوٹ، دریا خان، محسن وال، لیہ، فورٹ عباس، ظفروال، شیخوپورہ، پاکپتن، خانیوال، ساہیوال، پتوکی، میاں چنوں، منچن آباد، ہارون آباد، شرقپور شریف، سکھیکھی، چیچہ وطنی، گجرات، اوکاڑہ، بہاولنگر، میلسی، کہروڑ پکا، پیر محل، فیروزوالا، قصور، جہانیاں، خانپور، دنیاپور میں بھی زلزلہ آیا۔
پشاور، ایبٹ آباد، شانگلہ، بنوں، نوشہرہ، سوات، مانسہرہ، بٹگرام، ملاکنڈ اور لوئر دیر میں زلزلے کے جھٹکے محسوس کیے گئے، جب کہ شمالی وزیرستان، ضلع مہمند، ضلع کرم، بونیر اور اٹک میں بھی زلزلے کے جھٹکے محسوس ہوئے۔
میرپور آزاد کشمیر، مظفر آباد، وادئ نیلم، وادئ جہلم، گلگت، اسکردو، ہنزہ، دیامر میں بھی زلزلے کے جھٹکے محسوس کیے گئے۔ اسلام آباد سمیت مختلف شہروں میں لوگ خوف زدہ ہو کرگھروں سے باہر نکل آئے اور کلمہ طیبہ کا ورد کرنے لگے۔
زلزلہ پیما مرکز کا کہنا ہے کہ زلزلہ پاک افغان سرحد پر آیا، جس کی شدت 6.4 ریکارڈ کی گئی ہے۔ زلزلے کا مرکز تاجکستان میں تھا، جس کی گہرائی 80 کلو میٹر تھی۔
ترجمان این ڈی ایم اے نے کہا ہے کہ وہ ملک بھر میں تمام صوبوں سے رابطے میں ہیں، زلزلے سے ابھی تک کسی جانی نقصان کی اطلاع نہیں ملی، ادارہ زلزلے کے بعد صورت حال کا جائزہ لے رہی ہے، صورت حال سے عوام کو بھی آگاہ رکھا جا رہا ہے، ہنگامی مراکز کو بھی ہائی الرٹ کر دیا گیا۔
فیصل آباد شہر اورگرد و نواح میں زلزلے کے جھٹکوں سے عوام خوف زدہ ہو کر کلمہ پڑھتے ہوئے گھروں اور دفاتر سے باہر نکل آئے، زلزلے کے جھٹکے 10 سے 12 سیکنڈ تک محسوس کیے گئے تھے۔ ادھر لوئر دیر میں زلزلے کے باعث تیمرگرہ میں 2 خواتین بے ہوش ہو گئیں جنھیں اسپتال منتقل کیا گیا۔
