موسم سرما میں ایڑیاں پھٹنا نہایت تکلیف دہ مسئلہ بن سکتا ہے جو چلنا پھرنا بے حد مشکل بنا دیتا ہے جبکہ پھٹی ایڑیوں پر زخم بن جاتے ہیں اور خون بھی بہنے لگتا ہے۔
اے آر وائی ڈیجیٹل کے مارننگ شو گڈ مارننگ پاکستان میں شیف فرح نے سردیوں میں ایڑیوں کو پھٹنے سے بچانے کا نہایت آسان طریقہ بتایا۔
شیف فرح کے مطابق 4 عدد موم بتیاں لے کر پین میں ڈال کر انہیں پگھلا لیں، پگھلنے کے بعد ان میں سے دھاگہ نکال لیں۔ اس کے بعد اس میں ایک چائے کا چمچ ہلدی، ایک چمچ نمک، ایک چمچ ناریل کا تیل، ایک چمچ سرسوں کا تیل اور 2 چٹکی پھٹکری ڈال دیں۔
پھٹکری کے استعمال میں بہت احتیاط کریں کیونکہ یہ جلد کو کاٹ بھی سکتی ہے۔
ان تمام اشیا کو پین میں ہی اچھی طرح ملا لیں، اس کے بعد کسی جار میں بھر کر رکھ لیں۔ ٹھنڈا ہونے کے بعد یہ کریم کی شکل اختیار کرجائے گی۔
اس کریم کو روزانہ ایڑیوں پر لگائیں، صرف 2 دن میں ہی اس کا اثر واضح ہونا شروع ہوجائے گا۔
شیف فرح کے مطابق اس کریم کے روزانہ استعمال سے صرف ایک ہفتے میں ہی ایڑیاں نرم و ملائم ایسی ہوجائیں گی جیسے کبھی پھٹی ہی نہیں۔
