ایران کے صدر ابراہیم رئیسی کی ہیلی کاپٹر حادثے میں شہادت پر حماس نے رد عمل میں کہا ہے کہ وہ ایران کے ساتھ اس موقع پر مکمل یکجہتی کا اظہار کرتے ہیں۔
حماس نے آج پیر کی صبح کو ایک بیان میں ہیلی کاپٹر کے حادثے میں ایرانی صدر ابراہیم رئیسی کی موت پر تعزیت کا اظہار کرتے ہوئے انھیں فلسطینی گروپ کا ایک ’’معزز حامی‘‘ قرار دیا۔
الجزیرہ کے مطابق حماس نے کہا کہ غزہ میں اسرائیل-حماس جنگ کے آغاز ہی سے ابراہیم رئیسی نے ’فلسطینی مزاحمت‘ کی حمایت کی اور فلسطینیوں کے ساتھ یکجہتی کے لیے انتھک کوششیں کیں، اور ہم ان کی ان کوششوں کو سراہتے ہیں۔
ایرانی صدر اور وزیر خارجہ کی شہادت کی خبر نے غمزدہ کر دیا: وزیر خارجہ ترکیہ
حماس نے ایرانی صدر ابراہیم رئیسی اور وزیر خارجہ حسین امیرعبداللہیان کی موت پر سوگ کا اظہار کیا اور کہا کہ ان رہنماؤں نے صہیونیوں کے خلاف ہمارے عوام کی جائز جدوجہد کی حمایت کی، اور فلسطینی مزاحمت کو اپنا قابل قدر تعاون فراہم کیا۔
حماس کا یہ بھی کہنا تھا کہ ان رہنماؤں نے جنگ کے دوران ثابت قدم رہنے والی غزہ کی پٹی میں ’سیلابِ اقصیٰ کی لڑائی‘ کے دوران ہمارے لوگوں کے لیے تمام فورمز اور میدانوں میں یکجہتی اور حمایت کے لیے ان تھک کوششیں کیں۔
واضح رہے کہ اتوار کو ایرانی صدر ابراہیم رئیسی اور وزیر خارجہ حسین امیرعبداللہیان ایک ہیلی کاپٹر حادثے میں جاں بحق ہو گئے ہیں، ہیلی کاپٹر کا ملبہ آج پیر کی صبح آذربائیجان کی سرحد کے قریب ایک پہاڑی علاقے میں رات بھر کی تلاش کے بعد ملا۔
