اسلام آباد : وزارت خزانہ نے معاشی کارکردگی رپورٹ جاری کردی، جس کے تحت اخراجات اور مالیاتی خسارے میں اضافہ جبکہ برآمدات، درآمدات اور کرنٹ اکاؤنٹ خسارہ میں کمی ریکارڈ کی گئی ہے۔
رپورٹ کے مطابق غیرملکی سرمایہ کاری میں بھی44.2فیصد کمی جبکہ ترسیلات زر11فیصد کم ہوکر16ارب ڈالر رہیں، جولائی تا دسمبرسرکاری اخراجات میں19.8فیصد اضافہ ہوا۔
وزارت خزانہ کے مطابق جولائی تا دسمبر وفاق کے اخراجات6382ارب روپے تک جا پہنچے، قرضوں کے سود پر ادائیگیوں میں77فیصد اضافہ ہوا، جولائی تا جنوری مہنگائی کی شرح25.4فیصد رہی۔
اس کے علاوہ جولائی تا دسمبر ٹیکس آمدنی میں18.8فیصد اضافہ ریکارڈ کیا گیا، جس کے بعد ٹیکس آمدنی4699ارب روپے رہی جبکہ نان ٹیکس آمدن967ارب روپے رہی۔
معاشی کارکردگی رپورٹ کے مطابق جولائی تا جنوری برآمدات7.4فیصد کم ہوکر16.4ارب ڈالر رہیں اور درآمدات20.9 فیصد کم ہوکر33.5ارب ڈالر ریکارڈ کی گئیں۔
