اسلام آباد: حکومتی اعداد و شمار نے نااہل وزیر اعظم کے دور میں کیے جانے والے دعووں کی قلعی کھول دی۔ تجارتی خسارہ ہو، زرمبادلہ ذخائر یا پھر ترسیلات زر ہر شعبے کی صورتحال ابتر ہے۔
ادارہ شماریات کے مطابق نااہل وزیر اعظم کے دور میں تجارتی خسارے میں 56 فیصد اضافہ ہوا۔ نئے مالی سال کے پہلے ماہ میں تجارتی خسارے کا حجم 3 ارب 20 کروڑ ہوگیا۔
زرمبادلہ ذخائر میں بھی مسلسل کمی کا رجحان برقرار ہے۔ بیرونی قرضوں کی ادئیگیوں کی وجہ سے زرمبادلہ کے ذخائر تیزی سے کم ہو رہے ہیں۔ اسٹیٹ بینک کے مطابق صرف ایک ہفتے کے دوران زرمبادلہ کے ذخائر 30 کروڑ ڈالر کی کمی سے 20 ارب ڈالر کی سطح پر پہنچ گئے۔
رواں سال ذخائر میں 3 ارب ڈالر کی کمی ہوچکی ہے۔
بیرون ملک مقیم پاکستانیوں کی جانب سے ترسیلات زر میں جون 2017 سے 16 اعشاریہ 2 فیصد کمی رہی۔ جولائی میں تارکین وطن نے ایک ارب 54 کروڑ ڈالر پاکستان بھیجے۔
