اسلام آباد : الیکشن کمیشن نے صدر مملکت عارف علوی کی جانب سے چیف الیکشن کمشنر کو لکھے گئے خط پر اہم اجلاس طلب کرلیا۔
تفصیلات کے مطابق صدر مملکت عارف علوی کی جانب سےچیف الیکشن کمشنرکو لکھے گئے خط کے معاملے پر الیکشن کمیشن نے آج اہم اجلاس طلب کرلیا۔
چیف الیکشن کمشنرسکندر سلطان راجہ اجلاس کی صدارت کریں گے، ذرائع نے بتایا کہ اجلاس میں ممبران و سیکرٹری الیکشن کمیشن شریک ہوں گے۔
ذرائع کا کہنا تھا کہ اجلاس میں صدر مملکت کےدعوت نامے سمیت الیکشن کی تاریخ سے متعلق آئینی معاملات کا بھی جائزہ لیا جائے گا۔
گذشتہ روز صدر مملکت عارف علوی نے عام انتخابات کی تاریخ طے کرنے کیلیے چیف الیکشن کمیشنر سکندر سلطان راجہ کو خط لکھا تھا ، جس میں ملاقات کی دعوت دی گئی تھی۔
صدر مملکت کی جانب سے لکھے گئے خط میں چیف الیکشن کمیشنر کو آج یا کل ملاقات کی دعوت گئی تاکہ اس میں عام انتخابات کی تاریخ کے حوالے سے کوئی فیصلہ کیا جا سکے.
عارف علوی نے خط میں لکھا تھا کہ 9 اگست کو سابق وزیر اعظم شہباز شریف کے مشورے پر قومی اسمبلی تحلیل کی، صدر آرٹیکل 48 فائیو کے تحت اسمبلی تحلیل کے بعد 90 دن میں الیکشن کی تاریخ مقرر کرنے کا پابند ہے۔
